დღეს, 4 სექტემბერს პარლამენტმა "ამნისტიის შესახებ" კანონპროექტი მეორე მოსმენით განიხილა და 84 ხმით მხარი დაუჭირა.

პარლამენტის ცნობით, ამნისტიის კანონპროექტის ამოქმედების შემდეგ, დაახლოებით 1000 პატიმარი დაუყოვნებლივ გათავისუფლდება, ხოლო დაახლოებით 4 800-ს სასჯელი სხვადასხვა ვადით შეუმცირდება და ისინიც ეტაპობრივად დატოვებენ პენიტენციურ დაწესებულებებს.

ამნისტიის პროექტის მიხედვით გათვალისწინებულია: დაუყოვნებლივ გათავისუფლება, სასჯელის 1/2-ით, 1/4-ით, ან 1/6-ით შემცირება. ასევე, პრობაციონერებისთვის პირობითი მსჯავრის ერთი წლით შემცირებაა. თუმცა, საკანონმდებლო ორგანოში ამბობენ, რომ კანონპროექტი მკვლელობისთვის ნასამართლევ პირებს, ნარკორეალიზატორებს, სქესობრივ დანაშაულებს, ყაჩაღობას, ტერორიზმს, კორუფციულ და სამოხელეო დანაშაულებს, ქურდულ სამყაროს, კონვენციურ დანაშაულებს და სხვა მძიმე და განსაკუთრებით მძიმე კატეგორიის დანაშაულებს არ ეხება.

პარტია გახარია საქართველოსთვის წევრი, თეონა აქუბარდია ოცნების ამ კანონპროექტს უსამართლოს უწოდებს და მას ე.წ ზონდერების დაცვისკენ ორიენტირებულ ინიციატივად აფასებს. მისი თქმით, ეს მმართველი პარტიისგან წინასაარჩევნო განაცხადია და სამართლიანობის პრინციპებთან საერთო არაფერი აქვს.

გირჩის ლიდერი, იაგო ხვიჩია კი კანონპროექტში მეორე მოსმენის წინ შესულ ცვლილებებს აკრიტიკებს და აცხადებს, რომ "ხელისუფლებამ ადამიანები, რომელთაც გათავისუფლებას შეჰპირდა, გადააგდო"

"მეორე მოსმენით წარმოდგენილი ამნისტიის შესახებ პროექტი გაუარესებულია – ხელისუფლებამ ადამიანებს, რომელთაც გათავისუფლებას შეჰპირდა, გადააგდო! იმ ხალხის მდგომარეობა გაუარესდა, ვინც შეიძლება უკვე ზეიმობდა", – თქვა იაგო ხვიჩიამ კანონპროექტის განხილვისას.