ვენეციის კინოფესტივალის მუდმივი მონაწილე, იტალიელი რეჟისორი და სცენარისტი ახალი ფილმით ბრუნდება, სახელწოდებით Queer, სადაც მთავარ როლს დენიელ კრეიგი ასრულებს.

გასულ წელს ლუკა გუარდანინოს ვენეციის კინოფესტივალზე მონაწილეობა უნდა მიეღო ფილმით Challengers , თუმცა ფილმის პრემიერა მსახიობების გაფიცვის გამო ვერ შედგა.

რეჟისორი ამჯერადაც ძალიან საინტერესო პროექტით დაბრუნდა, ფილმი უილიამ სიუარდ ბეროუზის რომანის კინოადაპტაციას წარმოადგენს, მოქმედება 1950-იანი წლების მექსიკაში ვითარდება, სადაც ამერიკელ ემიგრანტს განსაკუთრებული გრძნობები უჩნდება ახალგაზრდა ბიჭის, სტუდენტის მიმართ.

ფოტო: Primicias

როგორც გუადანინო იხსენებს, პირველად ეს წიგნი 17 წლის ასაკში წაიკითხა და წიგნმა მასზე დიდი გავლენა მოახდინა. სამწუხაროდ, მან არ იცოდა ვინ იყო ბეროუზი და რამდენად მნიშვნელოვანი მწერალი იყო იმ დროს, თუმცა წიგნის სამყაროში თავდავიწყებით გადაეშვა სწორედ იმ დროს, როდესაც კინოს შექმნაზე ოცნებობდა.

რაც შეეხება ფილმში დენიელ კრეიგის მონაწილეობას, რეჟისორის თქმით,მას არასდროს უფიქრია, რომ მის ფილმში გადაღებას შეძლებდა, თუმცა შეთავაზების შემდეგ, კრეიგი მთავარი როლის შესრულებას მაშინვე დათანხმდა.

პრემიერამდე რამდენიმე საათით ადრე კრეიგმა The Associated Press-თან თავის როლზეც ისაუბრა, მას შიშველ სცენებში უნდა მიეღო მონაწილეობა. მისი პერსონაჟი, უილიამ ლი, მთელ დღეებს ტეკილის დალევასა და მამაკაცების დევნასა და მათზე ფიქრში ატარებს, ხოლო მარტოობისას ჰეროინს მოიხმარს.

"თუ ამ ფილმში არ ვიქნებოდი, ვისურვებდი, რომ ვყოფილიყავი, რადგან ეს ისეთი ფილმია, რომლის ყურება მსიამოვნებს, რომელსაც გადავიღებდი და რომელშიც მონაწილეობას მივიღებდი. ასეთი ფილმები ერთგვარი გამოწვევაა, მაგრამ რეალურად ეს გამოწვევა გადალახვადია.
ვფიქრობ, თუ ფილმში რაიმე არასწორი იყო, ლუკა აუცილებლად იტყოდა, მაგრამ თუ ამ ყველაფერს ის სწორად ჩათვლიდა, უბრალოდ გვეტყოდა, რომ გაგვეგრძელებინა. რაღაც ეტაპზე, შეიძლება ასეთმა სიტუაციამ შეგაშფოთოს კიდეც, მაგრამ გარკვეული პერიოდის მერე უბრალოდ იაზრებ, რომ შენ მის ხელში ხარ.
Queer ძალიან ძლიერი ემოციური დარტყმა იქნება ყველასთვის, ეს არის ფილმი სიყვარულის, დანაკარგის, მარტოობისა და ლტოლვის შესახებ "— განაცხადა დენიელ კრეიგმა.