ოკუპირებული აფხაზეთის თვითგამოცხადებული რესპუბლიკის ე.წ. საგარეო საქმეთა სამინისტროს ხელმძღვანელმა, სერგეი შამბამ დაადასტურა, რომ რუსეთმა აფხაზეთს დაფინანსება მიმდინარე წლის 1 სექტემბრიდან შეუჩერა და აფხაზურ მხარეს გარკვეული ვალდებულებების შესრულება მოსთხოვა. ამის შესახებ ეხო კავკაზა წერს.

შამბას თქმით, მოსკოვში არაერთხელ განაცხადეს, რომ "აღებული ვალდებულებების შეუსრულებლობამ გარკვეული სანქციები შეიძლება გამოიწვიოს“.

"ისინი 1-ლი სექტემბრიდან უკვე ამოქმედდება. მოგეხსენებათ, გარკვეული სოციალური დაფინანსება უკვე შეჩერებულია, რაც ეხება ექიმებს, მასწავლებლებს, ძალოვან სტრუქტურებს და სხვა. ეს აშკარად პირველი ნაბიჯებია. გარდა ამისა, დგას საკითხი, რომ ელექტროენერგიის იმ ნაკადში, რომელსაც ყოველ ზამთარში ვიღებთ, კომერციული ფასი უნდა გადავიხადოთ”, — განაცხადა შამბამ ბრიფინგზე.

შამბას თქმით, შეხვედრა აფხაზეთის ლიდერ ასლან ბჟანიასა და რუსეთის ფედერაციის პრეზიდენტის ადმინისტრაციის მოადგილე დიმიტრი კოზაკს შორის 19 აგვისტოს შედგა, ოქმი კი 26 აგვისტოთია დათარიღებული.

"ჩვენი არხებით, რასაკვირველია, ვცდილობდით ამ ვითარებაში გარკვევას.. ოფიციალურად დოკუმენტი არ მიგვიღია, თუმცა საკითხები, რომლებიც იქ დგას არაერთხელ გაჟღერებულა სხვადასხვა შეხვედრებზე“, — დაამატა შამბამ.

შეგახსენებთ, რომ მოსკოვი, გამოქვეყნებული დოკუმენტის მიხედვით, სოხუმისგან ითხოვს:

— ეკონომიკურ საქმეებზე სასამართლო და საარბიტრაჟო გადაწყვეტილებების აღიარებისა და აღსრულების შესახებ შეთანხმების რატიფიცირება;

— რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ შეთანხმების ძალაში შესვლის უზრუნველყოფა;

— რუს ინვესტორებისთვის შეზღუდვების მოხსნა კომერციული უძრავი ქონების ბაზარზე (აპარტამენტები).