ვლადიმირ პუტინმა მონღოლეთის პრეზიდენტი BRICS-ის სამიტზე მიიწვია, რომელიც 2024 წლის ოქტომბერში გაიმართება, — ამის შესახებ ინფორმაციას რუსული სამთავრობო მედია TASS ავრცელებს.

„მსურს, მიგიწვიოთ რუსეთში, ყაზანში, სადაც წელს BRICS-ის სამიტი ჩატარდება. ეს იქნება პირველი ასეთი დონის ღონისძიება ამ ორგანიზაციის გაფართოების შემდეგ. იმედი მაქვს, რომ მიიღებთ მონაწილეობას BRICS+ ფორმატში. გელოდებით“, – განაცხადა პუტინმა ულანბატორში.

რუსეთის პრეზიდენტი ოფიციალური ვიზიტის ფარგლებში მონღოლეთში გუშინ ჩავიდა. პუტინის ვიზიტი ორდღიანია.

შეგახსენებთ, რომ მონღოლეთი სისხლის სამართლის საერთაშორისო სასამართლოს რომის წესდების (ICC), იგივე რომის სტატუტის წევრი 2003 წელს გახდა. რაც იმას ნიშავს, რომ ქვეყანა ვალდებულია ითანამშრომლოს სასამართლოსთან, მის ტერიტორიაზე მყოფი ყველა ეჭვმიტანილი დააპატიმროს და სასამართლოს გადასცეს.

სააგენტო Bloomberg-ის ცნობით, ულან-ბატორი პუტინს დაჰპირდა, რომ ქვეყანაში ჩასვლის შემთხვევაში მას არ დააპატიმრებენ.

რაც შეეხევა BRICS-ს, ის ბრაზილიის, რუსეთის, ინდოეთის, ჩინეთისა და სამხრეთ აფრიკის აბრევიატურაა, რამდენიმე უმსხვილეს ეკონომიკას მოიცავს. მან ოთხი ახალი წევრი მიიღო ამ წლის დასაწყისში — ირანი, არაბთა გაერთიანებული საამიროები, ეთიოპია და ეგვიპტე. საუდის არაბეთი მიწვეული იყო გასაწევრიანებლად, თუმცა სამეფო ამ ნაბიჯისთვის მზად არაა.

Bloomberg-ის ცნობით, ჯგუფის შემდგომი გაფართოება შეიძლება მოხდეს 22-24 ოქტომბერს, ყაზანში, სამიტზე. მალაიზია, ტაილანდი, თურქეთი და აზერბაიჯანი იმ ქვეყნებს შორის არიან, რომლებიც BRICS-ში აპირებენ გაწევრიანებას.

შეგახსენებთ, რომ BRICS-ში გაწევრიანების შესახებ, მიმდინარე წლის 2 სექტემბერს, თურქეთმა განაცხადა, 20 აგვისტოს — აზერბაიჯანმა.

ამავე თემაზე წაიკითხეთ:

Bloomberg: თურქეთმა BRICS-ში გაწევრიანებაზე განაცხადი შეიტანა

პუტინი მონღოლეთში ჩავიდა