"თიურინგიაში არჩევნების შედეგები, რომელშიც ულტრამემარჯვენე პარტია ლიდერობს, "მწარე და შემაშფოთებელია", — ამის შესახებ გერმანიის კანცლერი ოლაფ შოლცი აცხადებს.

შეგახსენებთ, რომ გერმანიის ორ რეგიონში —საქსონიისა და თიურინგიის გამართულ რეგიონულ არჩევნებში ულტრამემარჯვენე და კონსერვატიული პარტიები იმარჯვებენ.

"ჩვენი ქვეყანა ამას ვერ და არც უნდა შეეგუოს. ალტერნატივა გერმანიისთვის ზიანს აყენებს გერმანიას. ის ასუსტებს ეკონომიკას, ყოფს საზოგადოებას და ანგრევს ჩვენი ქვეყნის რეპუტაციას“, – აღნიშნა შოლცმა.

DW-ს ინფორმაციით, თიურინგიაში პარტია ალტერნატივა გერმანიისთვის ხმების 32,8% აქვს და თითქმის 9%-ით უსწრებს კონსერვატიულ ქრისტიან-დემოკრატიულ კავშირს (CDU), რომელსაც 23,6%-ს აქვს. მესამე ადგილზე სარა ვაგენკნეხტის კავშირი (BSW) გავიდა ხმების 15,8%-ით.

საქსონიაში ერთ პროცენტზე ცოტა მეტით უსწრებს CDU AfD-ს. იქ AfD-მა ხმების 31.9% მოაგროვა, AfD-მ — 30.6%. მესამეზე, BSW-ს 11.8% აქვს.

DW წერს, რომ დამკვირვებლებისთვის ყველაზე საინტერესო შედეგი თიურინგიაში დაფიქსირდა, სადაც პარტია ალტერნატივა გერმანიისთვის (AfD) პირველი ულტრამემარჯვენე პარტია გახდა, რომელიც მეორე მსოფლიო ომის შემდეგ, არჩევნებში იგებს და თითქმის 10%-ით მეტ ხმებს აგროვებს, ვიდრე ქრისტიან-დემოკრატები (CDU).