მიმდინარე წლის 27 აგვისტოს, პროკურორმა ჯეკ სმიტმა, 2020 წლის არჩევნების შედეგების შეცვლის მცდელობის საქმეზე, დონალდ ტრამპს განახლებული საბრალდებო დასკვნა წარუდგინა.

The Washington Post-ის ცნობით, განახლებული საბრალდებო დასკვნა იუსტიციის დეპარტამენტის მიერ დაწესებული "60-დღიანი წესის" ამოქმედებამდე 10 დღით ადრე გახდა ცნობილი. ეს უკანასკნელი ექსპრეზიდენტის წინააღმდეგ ახალი ბრალდებების წარდგენას უშლის ხელს.

სმიტი კოლუმბიის რაიონული სასამართლოსთვის დაწერილ შეტყობინებაში აცხადებს, რომ საბრალდებო დასკვნა იმ ახალი ნაფიცი მსაჯულების მიერაა წარდგენილი, რომლებსაც ამ საქმის მტკიცებულებები მანამდე არ ჰქონდათ მოსმენილი.

გენერალური პროკურორის მერიკ გარლანდის ყოფილმა სპიკერმა, ენტონი კოლიმ განაცხადა, რომ დასკვნაში ძირითადად "მცირე შესწორებებია შეტანილი, უზენაესი სასამართლოს საეჭვო განჩინებების აღმოსაფხვრელად". მისივე თქმით, "ტრამპმა უგულებელყო ფაქტები, მოქმედებდა კანონის გვერდის ავლით და ამომრჩეველთა ნების საწინააღმდეგოდ".

Reuters წერს, რომ ახალი ბრალდებიდან ამოღებულია საქმის ის ნაწილი, რომელიც იუსტიციის დეპარტამენტთან ტრამპის ურთიერთობას შეეხება. ეს ნაწილი უზენაესმა სასამართლომ სისხლის სამართლებრივი დევნისგან იმუნიტეტით დაცულად მიიჩნია.

"სავარაუდოდ, ეს არის მცდელობა, რომ სასამართლო პროცესი გაგრძელდეს“, — წერს სააგენტო.

შეგახსენებთ, რომ ტრამპს ოთხი ბრალდება უკვე წაყენებული აქვს. ისინი 2020 წლის არჩევნების შედეგების შეცვლის მცდელობას უკავშირდება. ცნობისათვის, ამერიკის უზენაესმა სასამართლომ ყოფილ პრეზიდენტს ოფიციალურ ქმედებებზე სისხლის სამართლებრივი დევნისგან აბსოლუტური იმუნიტეტი მიანიჭა.

ამ ყველაფრის საპასუხოდ ამერიკის ყოფილმა პრეზიდენტმა, დონალდ ტრამპმა სოციალურ ქსელში დაწერა, რომ პროკურორი სასოწარკვეთილი აქტით ცდილობს "ჯადოქრებზე ნადირობის" დაბრუნებას და ახალი ბრალდება სასაცილოა.

ამას გარდა, ტრამპმა პროცესი ნოემბრის არჩევნებში ჩარევის მცდელობად შეაფასა და მისი დაუყოვნებლივ გაუქმება მოითხოვა.