102 წლის მანეტ ბეილი დიდ ბრიტანეთში ყველაზე ხანდაზმული ადამიანია, რომელიც თვითმფრინავიდან პარაშუტით გადმოხტა.

მანეტ ბეილიმ კვირას, საკუთარი დაბადების დღის აღსანიშნავად ბეკლეს აეროდრომზე შეასრულა ფრენა. მას აქამდეც არაერთხელ მიუღია მსგავსი გაბედული გადაწყვეტილებები, მაგალითად, მაშინ, როდესაც 100 წლის იუბილეს აღსანიშნავად 130 მილი/სთ სიჩქარით ფერარით მიჰქროდა სილვერსტოუნში.

"უნდა ვაღიარო, რომ გადმოხტომისას ძალიან ძლიერად დავხუჭე თვალები, ცოტა საშიშიც კი იყო, მაგრამ მინდა იმ ადამიანებს, რომლებიც 80-90 წლის არიან ვუთხრა, რომ არაფერი დათმოთ, უბრალოდ ცხოვრება განაგრძეთ. მე არ შემიძლია დრო დავკარგო, შეიძლება სხვა ადამიანებს ჩემს ასაკში ართრიტი აწუხებთ, მაგრამ მე კარგ ფრომაში ვარ" — განუცხადა BBC Radio Suffolk-ს მანეტ ბეილმა.

პარაშუტით გადმოხტომის გადაწყვეტილება ბეილიმ მას შემდეგ მიიღო, როდესაც გაიგო, რომ მისი მეგობრის 85 წლის მამამ იგივე გააკეთა.

"თუ 85 წლის კაცს შეუძლია ამის გაკეთება, მეც შემიძლია", — აღნიშნა მან.

მანეტ ბეილი მეორე მსოფლიო ომის დროს ქალთა სამეფო საზღვაო სამსახურში მსახურობდა, მაგრამ მაშინ თვითმფრინავიდან პარაშუტით გადმოხტომაზე არც უფიქრია.