"გადავწყვიტე დავრჩე კიდევ ერთი წელი ვალენსიაში და დავეხმარო გუნდს თავისი მიზნის მიღწევაში", — ამის შესახებ სოციალურ ქსელში ფეხბურთელი, გიორგი მამარდაშვილი წერს.

მისი თქმით, ვალენსიამ მისი ცხოვრება შეცვალა.

"ვალენსიაზე და ამ კლუბზე საუბარს მადლიერების გამოხატვის გარეშე ვერ დავიწყებ. მინდა მადლობა გითხრათ, სამი წლის განმავლობაში უწყვეტი მხარდაჭერისთვის და სიყვარულისთვის, რომელსაც კლუბში მოსვლის პირველი დღიდან, ყველა ეტაპზე ვგრძნობ.

სიტყვები არ არის საკმარისი, გამოვხატო მადლიერება იმ ყველაფრისთვის რაც ვალენსიამ, ამ დიდმა საფეხბურთო ოჯახმა მომცა. ვალენსიამ შეცვალა ჩემი ცხოვრება და შექმნა ჩემი კარიერა.

სწორედ ამიტომ, გადავწყვიტე დავრჩე კიდევ ერთი წელი ვალენსიაში და დავეხმარო გუნდს თავისი მიზნის მიღწევაში.

ყველამ ვიცით, როგორი რთული წელი გველოდება და როგორი გარდამტეხია ეს პერიოდი თავად კლუბისთვისაც. ამიტომ, როგორც არასდროს ისე უნდა დავდგეთ ერთად და ვიბრძოლოთ ბოლომდე!", — წერს მამარდაშვილი.

შეგახსენებთ, რომ გიორგი მამარდაშვილი ოფიციალურად უკვე ინგლისური საფეხბურთო კლუბის, ლივერპულის ფეხბურთელია.

26 აგვისტოს, იტალიელი ჟურნალისტმა, ფაბრიციო რომანომ გაავრცელა განცხადება, რომ მამარდაშვილი ლივერპულს 2025 წლის ივლისში შეუერთდება.

"გიორგი მამარდაშვილი ვალენსიიდან ლივერპულში გადასვლამდე სამედიცინო შემოწმებას გაივლის. ხელშეკრულება 35 მილიონი ევროს საფასურად გაფორმდება, პლუს გათვალისწინებულია პუნქტი, რომლითაც ესპანელები თანხას გიორგის შემდეგი გაყიდვიდანაც მიიღებენ, მაგრამ მამარდაშვილი ლივერპულს 2025 წლის ივლისში შეუერთდება. ამ სეზონში კი ვალენსიაში დარჩება", — წერს რომანო.

Transfermarkt-ის მონაცემებით, ქართველი ფეხბურთელი, გიორგი მამარდაშვილი, მსოფლიოში ყველაზე ძვირადღირებული მეკარეა და მისი სატრანსფერო ღირებულება 45 მილიონი ევროა.