სახელმწიფო უსაფრთხოების სამსახურის ყოფილმა მაღალჩინოსანმა სოსო გოგაშვილმა, ციხიდან უნივერსიტეტში ჩააბარა და 100%-იანი დაფინანსება მიიღო.

ინფორმაციას სოსო გოგაშვილის შვილი, ნინი გოგაშვილი ავრცელებს.

"მამა პედაგოგის დახმარების გარეშე, ჩვენს მიერ გაგზავნილი საგამოცდო წიგნების საშუალებით მეცადინეობდა საკანში.

დაისახა მიზანი, იშრომა და მიაღწია მიზანს! მამა სკოლაში გამორჩეული მოსწავლე იყო, შემდეგ ეკონომისტი მაგისტრის ხარისხით, შემდეგ საერთაშორისო ურთიერთობების დოქტორი, ვიცე-პოლკოვნიკი და ახლა კიდევ ახლის შესწავლის ეტაპზეა.

რაცარუნდა უსამართლო რეალობაში აღმოჩნდე და “ადამიანებმა” სცადონ შენი და შენი ოჯახის განადგურება, ყოველთვის უნდა იპოვო ძალა, არ გაჩერდე და არასდროს დაკარგო ღმერთის იმედი. ჩვენ ვცდილობთ ეს ძალა ერთად ვიპოვოთ“, — წერს ნინი გოგაშვილი სოციალურ ქსელში.

ცნობისთვის, სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი, 2023 წლის მარტში, თბილისის საქალაქო სასამართლომ დამნაშავედ ცნო და 5 წლით თავისუფლების აღკვეთა მიუსაჯა. მას ბრალად ედებოდა სახელმწიფო საიდუმლოს განზრახ გახმაურება, პირადი ცხოვრების საიდუმლოს უკანონოდ მოპოვება და შენახვა, სამსახურებრივი უფლებამოსილების გადამეტება, პერსონალური მონაცემების უკანონოდ მოპოვება შენახვა, გავრცელება მასობრივი მაუწყებლობის მეშვეობით და ცეცხლსასროლი იარაღის მართლსაწინააღმდეგო შენახვა. გოგაშვილი 2022 წლის 16 ივლისს დააკავეს.