ხაშურისა და მიმდებარე დასახლებების წყალარინების სისტემის გაუმჯობესებისთვის საქართველო საფრანგეთის განვითარების სააგენტოსგან 30 მილიონი ევროს კრედიტს ითხოვს. პრემიერ-მინისტრის განკარგულება 15 აგვისტოთა დათარიღებული. სესხის ხანგრძლივობა 20, ხოლო სესხის საშეღავათო პერიოდი 5 წელია.

დღეს გამართულ ბრიფინგზე პრემიერ-მინისტრ, ირაკლი კობახიძეს ჟურნალისტებმა აღნიშნულ განკარგულებაზე დაუსვეს კითხვა.

კობახიძემ განაცხადა, რომ სესხებს საქართველო ხან დასავლეთიდან იღებს, ხან აღმოსავლეთიდან, ეს ჩვეულებრივი პროცესია, დასავლელ პარტნიორებზე თავდასხმასთან კავშირში არ არის და საქართველოს მთავრობას ვალს ვერ დაამადლიან.

შეგახსენებთ, რომ რეგიონული განვითარებისა და ინფრასტრუქტურის სამინისტრომ ხაშურის წყალარინების სისტემის გაუმჯობესების პროექტის დაწყების შესახებ ინფორმაცია 2022 წლის ნოემბრის ბოლოს გაავრცელა.

საქართველოს წყალმომარაგების კომპანიის მიერ 2024 წლის მარტში გამოქვეყნებული ინფორმაციის თანახმად, მასშტაბური პროექტი რამდენიმე ლოტისგან შედგება. პირველი ლოტის ფარგლებში ქალაქის ცენტრალურ ნაწილში აშენდება წყალარინების და მთლიანი ქალაქის წყალმომარაგების ქსელი. 2025 წლის ბოლოდან დაგეგმილია ხაშურის მოსახლეობის 24-საათიანი წყალმომარაგებით უზრუნველყოფა.

საიტზე ვკითხულობთ, რომ მასშტაბური პროექტის დასრულების შემდეგ, ქალაქ ხაშურის მოსახლეობის, დაახლოებით 30 000 ადამიანი, 24-საათიანი წყალმომარაგებითა და წყალარინების მოწესრიგებული ინფრასტრუქტურით ისარგებლებს.

ქალაქ ხაშურის წყლისა და წყალარინების ინფრასტრუქტურის სამშენებლო სამუშაოებს საფრანგეთის განვითარების სააგენტოსა და ევროკავშირის მხარდაჭერითა და სახელმწიფო ბიუჯეტის თანადაფინანსებით 330 მილიონ ლარზე მეტი მოხმარდება.