საქართველოს თავდაცვის მინისტრი, ლევან იზორია, რუსეთთან კონფლიქტზე საუბრისას ამბობს, რომ ყველა მოქალაქის მოვალეობაა თავი აარიდოს პროვოკაციას. ამის შესახებ მან მთავრობის სხდომის დასრულების შემდეგ ბრიფინგზე განაცხადა.

კითხვაზე - უნდა ჰქონდეს თუ არა საქართველოს იმაზე მკაცრი პოლიტიკა რუსეთთან ვიდრე ახლა აქვს, იმის ფონზე რომ საერთაშორისო საზოგადოება საკმაოდ მკაცრია - იზორიამ თქვა, რომ მათ აქვთ შეთანხმებული პოლიტიკა სტრატეგიულ პარტნიორებთან და ეს პოლიტიკა სტრატეგიულ ინტერესებს უკავშირდება:

"ეს მდგომარეობს ჩვენი ერის მშვიდობის შენარჩუნებასთან, სტაბილურ განვითარებასთან. ის მონაპოვარი, რაც წლების განმავლობაში დემოკრატიის განვითარებით გვაქვს აუცილებლად უდნა შევინარჩუნოთ და უფრო განვავითაროთ. ის ინტერესი, ის ინვესტიციები, რომელიც გვაქვს დასავლელი პარტნიორებისგან, ითვალისწინებს უსაფრთხოების გარემოს განმტკიცებას. ცივი გონებით უდნა შევინარჩუნოთ სტაბილურობა და სიმშვიდე. ყველა მოქალაქის პასუხისმგებლობაა, რომ თავიდან ავიცილოთ მოსალოდნელი პროვოკაციები".

დღესვე მინისტრმა კიდევ ერთხელ ისაუბრა ამერიკის ვიცე-პრეზიდენტის, მაიკ პენსის საქართველოში ვიზიტზე.

"ჩვენ მკაფიოდ და მკაცრად გავაგრძელებთ ტერიტორიების არაღიარების პოლიტიკას. ამ ნაწილში ჩვენ გვაქვს მკაფიო მხარდაჭერა. ვიცე-პრეზიდენტმა თქვა, რომ მისი ვიზიტი და აქ ჩამოსვლის ფაქტი არის ამ არაღიარების პოლიტიკის მკაფიო გამოხატულება. ქვეყნის ტერიტორიებისა და სუვერენიტეტის პრინციპული მხარდაჭერა. მან ასევე აღნიშნა, რომ სტრატეგიული თანამშრომლობის ასეთი ხარისხი ჩვენს ქვეყნებს შორის მანამდე არ ყოფილა".

მაიკ პენსი საქართველოში ორდღიანი ვიზიტით 31 ივლისს ჩამოვიდა. მას ჰქონდა შეხვედრები ხელისუფლებისა და ოპოზიციის წარმომადგენლებთან და გააჟღერა საქართველოს მხარდამჭერი არაერთი განცხადება.