აზერბაიჯანმა ოფიციალურად გამოთქვა BRICS-ის წევრობის სურვილი, ინფორმაციას გამოცემა news.az ავრცელებს, ქვეყნის საგარეო უწყების პრესსპიკერზე დაყრდნობით.

განაცხადის შეტანას წინ უძღოდა ასტანაში 3 ივლისს ხელმოწერილი დეკლარაცია სტრატეგიული პარტნიორობის შესახებ ჩინეთსა და აზერბაიჯანს შორის. დეკლარაცია ასახავდა აზერბაიჯანის სურვილს BRICS-ის წევრობასთან დაკავშირებით, ჩინეთი კი ამას მხარს უჭერდა. მიმდინარე კვირაში აზერბაიჯანს ოფიციალური ვიზიტით ეწვია ვლადიმერ პუტინიც.

ცნობისთვის, აკრონიმი BRICS - ი მომდინარეობს 5 სწრაფადგანვითარებადი ქვეყნის სახელწოდების პირველი ასოებისგან (ბრაზილია, რუსეთი, ინდოეთი, ჩინეთი, სამხრეთ აფრიკის რესპუბლიკა).

გაერთიანება, 2006 წელს სწორედ ბრაზილიამ, რუსეთმა, ინდოეთმა და ჩინეთმა დაარსეს. მათ სამხრეთ აფრიკის რესპუბლიკა 2010 წელს შეუერთდა, მოგვიანებით კი ეგვიპტე, ირანი, ეთიოპია და არაბთა გაერთიანებული საემიროები.

BRICS - ის გაცხადებული მიზანია, ჩრდილო ამერიკისა და დასავლეთ ევროპის განვითარებულ ქვეყნებთან ეკონომიკურ კონკურენციაში შესვლა და გლობალურ ეკონომიკაში დომინაციის მიღწევა.