პრეზიდენტმა, გიორგი მარგველაშვილმა მისი წინამორბედისთვის, მიხეილ სააკაშვილისთვის მოქალაქეობის მინიჭებაზე განაცხადა, რომ ეს იქედან გამომდინარე იქნება, თუ რას გადაწყვეტს სააკაშვილი, მიმართავს თუ არა საქართველოს ამ თხოვნით. ამის შესახებ მან რუსთავი 2-ზე, დავით ნიკურაძესთან ინტერვიუში ისაუბრა.

მისივე თქმით, მიხეილ სააკაშვილს, რომელიც ორჯერ იყო პრეზიდენტი, არ უნდა დაეთმო საქართველოს მოქალაქეობა:

"მე არ ვაკრიტიკებ სააკაშვილს და არ ვარ შესული მასთან პოლემიკაში, ვინაიდან მიმაჩნია რომ ქვეყანამ მომავლით უნდა იცხოვროს. ერთი გამონაკლისი იყო, როცა სააკაშვილმა დათმო საქართველოს მოქალაქეობა და ეს არ მომეწონა. მაშინვე ნათლად ვთქვი, რომ პრეზიდენტი, რომელიც ორჯერ იყო ქვეყნის უმაღლესი მთავარსარდალი, იმდენად პატივს უნდა სცემდეს საკუთარი ქვეყნის მოქალაქეობას, რომ არ დათმოს. ამასთან, ის თუ როგორი იქნება ჩემი პასუხი ამაზე, იქედან გამომდინარე იქნება, რას გადაწყვეტს სააკაშვილი, მიმართავს თუ არა ქვეყანას თხოვნით მოქალაქეობის თაობაზე".

მიხეილ სააკაშვილს უკრაინის მოქალაქეობა გასულ კვირას ჩამოართვეს. უკრაინის ხელისუფლების ინფორმაციით, სააკაშვილისთვის მოქალაქეობის ჩამორთმევის საფუძველი გახდა შესაბამისი კანონის ერთ-ერთი მუხლი, რაც მოქალაქეობის მიღებას ტყუილის გამოყენებით გულისხმობს. კერძოდ, სააკაშვილმა ანკეტაში მიუთითა, რომ მის მიმართ არ მიმდინარეობდა სისხლის სამართლებრივი დევნა რომელიმე სახელმწიფოში, თუმცა საქართველოში მის წინააღმდეგ არაერთ საქმეზეა გამოძიება დაწყებული. მიხეილ სააკაშვილის თქმით, ის არ აპირებს არცერთი სხვა ქვეყნის მოქალაქეობის მიღებას, ან თავშესაფრის მოთხოვნას.