საქართველოს პრეზიდენტის მრჩეველი საგარეო ურთიერთობების საკითხებში, თენგიზ ფხალაძე პრეზიდენტის ინიციატივას, საქართველოში აშშ-ს სპეციალური წარმომადგენლის დანიშვნის შესახებ, განმარტავს. მისი თქმით, აშშ-ს წარმომდგენელი იმ ქვეყნებში ინიშნება, რომლის მიმართაც განსაკუთრებული ინტერესი არსებობს.

"სპეციალური წარმომადგენელი, ეს არის აპრობირებული პრაქტიკა. ამერიკის ადმინისტრაცია, როდესაც რაღაც საკითხი განსაკუთრებულად აინტერესებს, ნიშნავს თეთრი სახლის სპეციალურ წარმომადგენელს. როდესაც ჩვენ გვქონდა ძალიან სერიოზული მოლაპარაკებები გეოპოლიტიკურ პროექტებზე - ბაქო-თბილისი-ჯეიჰანი, ბაქო-თბილისი-ერზრუმი, მაშინ არსებობდა კლინტონის ადმინისტრაციის წარმომადგენელი კასპიის ზღვის საკითხებში, რომელიც ეხმარებოდა საქართველოს ეს პროექტები განხორციელებულიყო," - აღნიშნა თენგიზ ფხალაძემ.

საქართველოს პრეზიდენტის, გიორგი მარგველაშვილის ინიციატივის შესახებ გუშინ, პირველ აგვისტოს გახდა ცნობილი. მარგველაშვილმა ამერიკის შეერთებული შტატების ვიცე-პრეზიდენტს, მაიკ პენსს აშშ-სპრეზიდენტის მიერ საქართველოს საკითხებში სპეციალური წარმომადგენლის დანიშვნის ინიციატივით მიმართა. საქართველოს პრეზიდენტის ადმინისტრაციის ინფორმაციით, პენსი ამ საკითხით დაინტერსდა.