აშშ-ის სახელმწიფო მდივანმა, ენტონი ბლინკენმა განაცხადა, რომ გადაიხედა აშშ-სა და საქართველოს ურთიერთობა და შეაჩერებს 95 მილიონ დოლარზე მეტ დახმარებას, რომელსაც "პირდაპირი სარგებელი მოჰქონდა საქართველოს მთავრობისთვის".

ბლინკენის განცხადებით, საქართველოს ხელისუფლების ანტიდემოკრატიული ქმედებები და ცრუ განცხადებები შეუთავსებელია ევროკავშირისა და ნატოს წევრობის ნორმებთან.

დაფინანსების შეწყვეტის მიუხედავად, შეერთებული შტატები არ წყვეტს ხალხისთვის სასარგებლო პროგრამებს, აქტივობების მხარდაჭერას და დაფინანსებას.

სახელმწიფო მდივანმა აღნიშნა, რომ ყველაფრის მიუხედავად, შეერთებული შტატები რჩება ქართველი ხალხისა და მისი ევროატლანტიკური მისწრაფებების ერთგული.

"ჩვენ ორ ქვეყანასა და მოქალაქეებს შორის 32 წელზე მეტი ხნის მეგობრობისა და პარტნიორობის განმავლობაში შეერთებული შტატების ხალხმა გაიღო 6,2 მილიარდ დოლარზე მეტის დახმარება, რამაც წვლილი შეიტანა საქართველოს ეკონომიკისა და დემოკრატიული ინსტიტუტების განვითარებასა და გაძლიერებაში. ჩვენმა მხარდაჭერამ წვლილი შეიტანა საქართველოს თავდაცვის ძალებისა და სანაპირო დაცვის აღჭურვასა და წვრთნაში, სკოლებისა და საავადმყოფოების აშენებაში, მასწავლებლების, საჯარო მოსამსახურეებისა და სამედიცინო პროფესიონალების გადამზადებაში", — ვკითხულობთ ბლინკენის განცხადებაში.