ამერიკის შეერთებული შტატების ვიცე-პრეზიდენტმა, მაიკ პენსმა, საქართველოში ყოფნისას, გიორგი კვირიკაშვილთან ერთად, პირველ აგვისტოს გამართულ პრესკონფერენციაზე ყურადღება სტრატეგიულ პარტნიორობაზე, რუსეთის მიმართ დაწესებულ სანქციებზე, ოკუპირებულ ტერიტორიებზე, ეკონომიკურ თანამშრომლობასა და ნატოსთან ინტეგრაციაზე:

სტრატეგიული პარტნიორობა

მაიკ პენსის თქმით, პრეზიდენტ დონალდ ტრამპის გზავნილია, რომ ამერიკა მხარს უჭერს საქართველოს და ის ქართველი ხალხის გვერდით დგას.

ვიცე-პრეზიდენტმა ღიად დააფიქსირა აშშ-ს პოზიცია, რომლის მიხედვითაც, მას სურს კიდევ უფრო დაუახლოვდეს საქართველოს და გაამყაროს ურთიერთობები სტრატეგიული თანამშრომლობის კუთხით:

"უკვე ათწლეულებია, ქართველი სამხედრო მოსამსახურეები ამერიკელებთან ერთად იბრძვიან კოსოვოში, ერაყში, ავღანეთში. რაც შეეხება ავღანეთს, საქართველომ ერთ სულ მოსახლეზე უფრო მეტი ჯარისკაცი გადაისროლა იქ, ვიდრე ნებისმიერი სხვა ქვეყნის წარმომადგენელმა. საქართველოს 31-მა მოქალაქემ თავისი სიცოცხლე შესწირა ამ ომს. მათი ხსოვნა ამერიკელების გულში დარჩება. ამერიკელები ქართველებთან ერთად გლოვობენ მათ დაღუპვას".

ვიცე-პრეზიდენტის თქმით, ძალიან შთამბეჭდავია, რომ საქართველო თავდაცვის სფეროში მთლიანი შიდა პროდუქტის ორ პროცენტს ხარჯავს და რომ ამით ნატოს ზოგ წევრს ასწრებს: "თუმცა ეს მძიმე რეალობით არის გამოწვეული".

რუსეთის მიმართ სანქციები

პენსის პრესკონფერენციის ერთ–ერთი უმნიშვნელოვანესი დეტალი იყო საუბარი რუსეთის მიმართ დაწესებულ საქნციებზე:

"ჩვენი პოზიციის გაჟღერებისათვის ვიტყვი, რომ პრეზიდენტმა ტრამპმა ხელი მოაწერა და მალე საკანონმდებლო სახე მიეცემა სანქციებს, რომელიც რუსეთის წინააღმდეგაა მიმართული. ჩვენ გვსურს რუსეთთან ურთიერთობები, მაგრამ ამის მიღწევა შეიძლება მას შემდეგ, რაც ის გააუქმებს თავის დესტრუქციულ ქმედებებს".

ოკუპირებული ტერიტორიები

"დონალდ ტრამპის ადმინისტრაცია ყოველთვის მკაცრ პასუხს გასცემს იმ ქვეყნებს, რომლებსაც პრეტენზია ექნებათ, ხელყონ საქართველოს სუვერენიტეტი და ტერიტორიული მთლიანობა", - ეს იყო ის მთავარი პოზიცია, რაც ოკუპირებულ ტერიტორიებთან მიმართებით თქვა ვიცე-პრეზიდენტმა.

მან ასევე დაამატა ისიც, რომ აშშ მკაცრად გმობს რუსეთის მიერ საქართველოს ოკუპაციას, იმ ფონზე, როცა რუსული ტანკები 40 კილომეტრის მოშორებითაა განლაგებული და საქართველოს 20 პროცენტი ოკუპირებულია.

ეკონომიკური თანამშრომლობა

ვიცე-პრეზიდენტის თქმით, აშშ საქართველოს არამხოლოდ თავდაცვის სფეროში, არამედ ეკონომიკურადაც დაეხმარება:

"ეს მოიტანს დამატებით სამუშაო ადგილებს, ეკონომიკურ წინსვლას და დარწმუნებული ვარ, რომ დადგება დღე, როდესაც ქვეყანა აღნიშნავს თავის ტერიტორიების დაბრუნებას".

მაიკ პენსის თქმით, საქართველოსთან ურთიერთობების გაღრმავება მნიშვნელოვანია, რუსული აგრესიის გადატანაში:

"დონალდ ტრამპის სიტყვებს კიდევ ერთხელ ხაზს გავუსვამ, ჩვენ თქვენ გვერდზე ვართ, ჩვენ ვაგრძელებთ მოკავშირეობას, საქართველოს მომავალი დასავლეთთან არის დაკავშირებული. ჩვენი ძალა ყოველთვის არის და იქნება ჩვენს ერთიანობაში".

ნატოსთან ინტეგრაცია

როგორც ვიცე-პრეზიდენტმა საუბრისას აღნიშნა, აშშ დღემდე მხარს უჭერს 2008 წლის ბუქარესტის სამიტის განცხადებას, რომლის მიხედვითაც, საქართველო გახდება ნატოს წევრი. ვაშინგტონ პოსტის ჟურნალისტის, ეშლი პარკერის კითხვის – დაიცავს თუ არა აშშ საქართველოს რუსეთის თავდასხმის შემთხვევაში? – პასუხად პენსმა თქვა, რომ აშშ მხარში უდგას მშვიდობის მოყვარე ქვეყნებს და ისინი ამას "არა მხოლოდ სიტყვიერად, არამედ ქმედებებით ამტკიცებენ":

"პრეზიდენტმა[ტრამპმა] ხაზი გაუსვა - ამერიკული კონტინგენტი თვალნათლივ ასახავს, რომ ჩვენ ერთგულნი ვართ ჩვენი ვალდებულებების".

მაიკ პენსის თქმით, ისინი გააგრძელებენ საქართველოს მთავრობასთან მუშაობას, რომ გაფართოვდეს და გაძლიერდეს საქართველოს დაახლოება ნატოსთან.

აშშ-ს ვიცე-პრეზიდენტი საქართველოს ორდღიანი ვიზიტით 31 ივლისს ეწვია.