პრინცესა ლეიას ცნობილი ოქროსფერი ბიკინი, რომელიც მსახიობმა ქერი ფიშერმა მოირგო ვარსკვლავურ ომებში, აუქციონზე $175 000-ად გაიყიდა.

კოსტიუმი ვარსკვლავური ომების 1983 წელს გამოშვებული ნაწილის, ჯედაის დაბრუნებაში გამოჩენის შემდეგ კინემატოგრაფიის ერთ-ერთ საკულტო ჩაცმულობად იქცა. პრინცესა ლეიას ბიკინი ჯაბა ჰატის ტყვეობაში ყოფნის დროს აცვია, როცა მის ტახტზეა მიჯაჭვული.

კოსტიუმი შვიდი ნაწილისგან შედგება — ბიკინის ბრას გარდა, მას გრძელი ნაჭრით გაფორმებული ქვედატანი, სამაჯური და სხვადასხვა აქსესუარი მოჰყვება, რომლებიც რიჩარდ მილერის, ვარსკვლავური ომების ერთ-ერთი დიზაინერის მიერაა შექმნილი.

ფოტო: Twentieth Century-Fox

Heritage Auctions-ის მიერ ორგანიზებულ აუქციონზე ცნობილი ფანტასტიკური ფილმებიდან კიდევ რამდენიმე მნიშვნელოვანი ნივთი გაიყიდა, მაგალითად მინიატურული ხომალდი Y-Wing Starfighter ვარსკვლავური ომებიდან $1,55 მილიონად შეიძინეს, ჰარი პოტერის ჯადოსნური ჯოხი ფილმიდან ჰარი პოტერი და აზკაბანის ტყვე $52 000-ად გაიყიდა, თორის ურო მარველის ფილმიდან Thor: The Dark World კი $81 500-ად.