ანაკლიის განვითარების კონსორციუმის დამფუძნებელი, მამუკა ხაზარაძე ამბობს, რომ ანაკლია აღმოსავლეთისა და აშშ-ს დამაკავშირებელი კარიბჭე გახდება. ამის შესახებ ხაზარაძემ მას შემდეგ განაცხადა, რაც ანაკლიის პორტის ამერიკული კომპანიისთვის 20-წლიანი მართვის უფლებით გადაცემაზე ხელშეკრულება გაფორმდა.

"ჩვენი კომპანია მიჰყვება იმ გრაფიკს, რომელიც შეთანხმდა სახელმწიფოსთან, მთავრობასთან, მიმდინარეობს კვლევითი სამუშაოები, რომლის ძირითადი ნაწილი დასრულების ფაზაშია. ფინანსურად პროექტი დაიხურება შემოდგომას და წლის ბოლოს დაიწყება ანაკლიის გრანდიოზული, საუკუნის პროექტად წოდებული მშენებლობა. ვფიქრობ, ყველა ერთად, მთავრობასთან ერთად მოვახდენთ საკმაოდ დიდ გარღვევას და ანაკლიას გავხდით დამაკავშირებელ კარიბჭეს აღმოსავლეთსა და ევროპას შორის, აღმოსავლეთსა და აშშ-ს შორის", - აღნიშნა მამუკა ხაზარაძემ.

ანაკლიის განვითარების კონსორციუმის ინფორმაციით, ანაკლიის ღრმაწყლოვანი ნავსადგურის პროექტის განხორციელება 2016 წელს დაიწყო. ის ანაკლიის მიმდებარედ, 340 ჰექტრის ფართობის ტერიტორიაზე აშენდება. პორტის მსენებლობისა და განვითარების ღირებულება 2,5 მილიარდ აშშ დოლარს შეადგენს. ანაკლიის პორტი რამდენიმე ეტაპად აშენდება და მოიცავს 9 ფაზას. საბოლოო ჯამში, მისი გამტარიანობა წელიწადში 100 მილიონ ტონას მიღწევს. პორტის პირველი ფაზის გახსნა და პირველი გეგმების მიღება 2020-2021 წლებში იგეგმება.

SSA Marine-ის ვიცე პრეზიდენტის, რობერტ ვოტერსის თქმით, იგი მოხარულია ამ პროექტით და ადგილობრივი პარტნიორობით. მისივე განცხადებით, აღნიშნული ხელშეკრულების ხელმოწერა მათთვის დიდი დღეა, იმ მხრივ, რომ ეს საქართველოს სატრანსპორტო დერეფნის განვითარებს მოიტანს ქვეყანაში და სრულიად ახალ სამუშაო ადგილებს შექმნის.

ამერიკული კომპანია ანაკლიის პორტის ტერმინალ ოპერატორი გახდა. ხელშეკრულებას ანაკლიის განვითარების კონსორციუმის დამფუძნებელმა, მამუკა ხაზარაძემ და ამერიკული კომპანიის SSA Marine ვიცე-პრეზიტენტმა, რობერტ უოთერსმა მთავრობის ადმინისტრაციაში მოაწერეს ხელი.