საქართველოს ჯანდაცვის მინისტრის, მიხეილ სარჯველაძის თქმით, ონკოლოგიური დიაგნოზის მქონე პაციენტებს, სხვადასხვა თერაპიისთვის საჭირო მედიკამენტების მიღება, პირდაპირ სამედიცინო დაწესებულებებში ხვალიდან, 24 ივლისიდან შეეძლებათ.

სარჯველაძის განცხადებით, ონკოლოგიური პაციენტებისთვის მკურნალობის პროცედურები მოწესრიგდა და გამარტივდა.

"გასულ კვირას, ხელი მოეწერა ბრძანებას, რომლითაც ონკოლოგიური პაციენტებისთვის კლინიკებში, მედიკამენტების გამოყენებით, მკურნალობის პროცედურები ახლებურად მოწესრიგდა. აქამდე, პაციენტს უწევდა გადასხმამდე ჯერ რეცეპტზე კლინიკაში მისვლა, შემდეგ აფთიაქებში წამლის ძებნა, მისი აღება და იმავე სამედიცინო დაწესებულებაში მიბრუნება. ამიერიდან კი კლინიკა პაციენტს აღარ შეაწუხებს და მას საყოველთაო ჯანდაცვის პროგრამით გათვალისწინებულ საჭირო მედიკამენტს თავად დაახვედრებს", — თქვა სარჯველაძემ.