საქართველოს პროკურატურის ინფორმაციით, ყალბი დოკუმენტების გამოყენებით, დიდი ოდენობით სხვისი ნივთის მოტყუებით დაუფლების მცდელობის ფაქტზე, უცხო ქვეყნის ერთ მოქალაქეს და საქართველოს 2 მოქალაქეს ბრალი წარუდგინეს.

ბრალდება 6-დან 9-წლამდე პატიმრობას ითვალისწინებს.

ფინანსთა სამინისტროს საგამოძიებო სამსახურის გამოძიებით დადგინდა, რომ ბრალდებულებმა სხვისი კუთვნილი, კახეთის რეგიონში მდებარე 2 710 000 კვ. მ. მიწის ნაკვეთის თაღლითურად დაუფლების მიზნით, ყალბი დოკუმენტები — უცხოენოვანი მინდობილობა და ნასყიდობის ხელშეკრულება დაამზადეს.

დანაშაულებრივი ჯგუფის ერთ-ერთ წევრზე მიწის ნაკვეთის გადაფორმების მიზნით, ბრალდებულებმა ყალბი დოკუმენტები საჯარო რეესტრში წარადგინეს, თუმცა, განზრახვა სისრულეში ვერ მოიყვანეს.

სამივე ბრალდებულს აღკვეთის ღონისძიების სახით პატიმრობა შეეფარდა.