ჩრდილოეთ კორეამ ივლისში გამოსცადა რაკეტა, რომელსაც შეუძლია მიაღწიოს ამერიკის დიდ ქალაქებს. ამერიკა აცხადებს, რომ ფხენიანთან მიმართებაში იაპონიამ, ჩინეთმა და სამხრეთ კორეამ საკუთარ სტრატეგიებს უნდა გადახედონ.

CNN-ის ცნობით, გაეროში ამერიკის ელჩმა ნიკი ჰილმა უარყო, რომ ვაშინგტონი გაეროს უშიშროების საბჭოსგან ელის ქმედებებს და დასძინა, რომ ჩრდილოეთ კორეას არაერთხელ დაურღვევია უშიშროების საბჭოს რეზოლუციები, თუმცა არცერთხელ დასჯილა.

"მოლაპარაკების დრო დასრულდა. ახლა დროა ჩინეთმა გადაწყვიტოს, სურს თუ არა ფხენიანთან დაკავშირებით არსებითი ნაბიჯების გადადგმა" - განაცხადა ჰილიმ.

შაბათს, 29 ივლისს, პრეზიდენტმა დონალდ ტრამპმა განაცხადა, რომ ის ჩინეთისგან იმედგაცრუებულია:

"ჩვენმა ყოფილმა სულელმა ლიდერებმა ჩინეთს ასობით მილიარდი დოლარის შოვნის საშუალება მისცეს, თუმცა ჩინეთი ჩრდილოეთ კორეასთან არაფერს აკეთებს, მოლაპარაკების გარდა. ჩვენ ამის გაგრძელებას აღარ ვაპირებთ. ჩინეთს შეუძლია ეს პრობლემა მარტივად გადაწყვიტოს".

დღეს ტრამპი ესაუბრა იაპონელ კოლეგას შინძო აბეს და ჩრდილოეთ კორეისთვის დიპლომატიური და ეკონომიკური წნეხის ქვეშ მოქცევა მოსთხოვა.

ჩრდილოეთ კორეამ პარასკევს, 28 ივლისსაც, გამოსცადა რაკეტა Hwasong-14 მის მაქსიმუმ მანძილზე. ფხენიანის განცხადებით, ვაშინგტონმა ეს ოპერაცია "მნიშვნელოვან გაფრთხილებად" უნდა მიიღოს.

ჩრდილოეთ კორეის დიქტატორი კიმ ჩენ ინი აცხადებს, რომ ფხენიანის ატომური იარაღი "ძვირფასი საშუალებაა", რომლის "დამარცხება ან უკეთესით ჩანაცვლება შეუძლებელია".