მოკლედ: სპეციალური საგამოძიებო სამსახურის ინფორმაციით, 13 წლის გოგოს პირადი ცხოვრების საიდუმლოს ხელყოფის ფაქტზე, 28 წლის კაცი დააკავეს.

  • დანაშაული 7 წლამდე პატიმრობას ითვალისწინებს.

რა მოხდა: გამოძიებით დადგინდა, რომ 2024 წლის 13 მარტს, დაზარალებულმა, ბრალდებული სოციალურ ქსელ ტიკტოკზე გაიცნო.

ისინი ყოველდღიურად საუბრობდნენ ერთმანეთთან მესინჯერის ვიდეოზარების საშუალებით, რა დროსაც ბრალდებული მუქარით არასრულწლოვანის შიშველ მდგომარეობაში ყოფნას მოითხოვდა.

  • ვიდეოზარით კომუნიკაციისას, არასრულწლოვანმა შენიშნა, რომ ბრალდებული ე.წ. სქრინებს იღებდა. მან ბრალდებულს ინტიმური შინაარსის ფოტოების წაშლა მოსთხოვა.
  • აპრილის თვეში დაზარალებულმა კომუნიკაცია შეწყვიტა ბრალდებულთან და სოციალურ ქსელში დაბლოკა, ასევე, არ პასუხობდა მის ზარებს და მოკლე ტექსტურ შეტყობინებებს.
  • მალევე, ტიკტოკზე გავრცელდა არასრულწლოვანის ფოტოები, სადაც ის შიშველ მდგომარეობაში ჩანდა. გოგოს ინტიმური ხასიათის ფოტოები გადაუგზავნეს მის მეგობარსაც.
  • ასევე, 13 წლის დაზარალებულს სოციალურ ქსელში უკავშირდებოდნენ მისთვის უცნობი ადამიანები, რომლებიც მისი ინტიმური ფოტოების დედასთან გადაგზავნით ემუქრებოდნენ.

სპეციალურ საგამოძიებო სამსახურს არასრულწლოვანმა მიმართა, რის შემდეგაც საგამოძიებომ დაადგინა ბრალდებულის ვინაობა და ადგილსამყოფელი.

  • ასევე, საგამოძიებომ, ბრალდებულის მობილურ ტელეფონში ნახა 13 წლის გოგოს ინტიმური ხასიათის ვიდეოჩანაწერი და ფოტოები, რომლებიც კანონით დადგენილი წესით განადგურდება.
  • ბრალდებულის მობილურ ტელეფონში, ასევე, ნახეს სხვა არასრულწლოვანი გოგოების ინტიმური შინაარსის ფოტოებიც.