მოკლედ: მოძრაობა ბალდის კანიონის შესანარჩუნებლად წერს, რომ სოფელ ბალდაში განვითარებული მოვლენებიდან გამომდინარე, გარემოს დაცვისა და სოფლის მეურნეობის სამინისტროს ორ დღეს აძლევენ იმისთვის, რომ უთხრან, როდის შეხვდება მათ მინისტრი ოთარ შამუგია.

დეტალები: მოძრაობა წერს, რომ სამინისტრო და დაცული ტერიტორიების სააგენტო, ამ დრომდე არ გამოხმაურებიან ბალდაში განვითარებულ ბოლოდროინდელ მოვლენებს.

  • "შეხვედრა [სოფლის მეურნეობის მინისტრთან] საჯარო ფორმატში, შემდეგი კვირის განმავლობაში უნდა გაიმართოს. წინააღმდეგ შემთხვევაში მოგვიწევს კონკრეტული ზომების მიღება", — წერს მოძრაობა ბალდის კანიონის შესანარჩუნებლად.

კონტექსტი: შინაგან საქმეთა სამინისტრომ, განზრახ მკვლელობის მცდელობის და მუქარის ბრალდებით, დააკავა ორი ძმა, რომლებიც 11 ივნისს, ბალდის კანიონის მცველებს კარავში თავს დაესხნენ.

  • ერთ-ერთმა ბრალდებულმა, ურთიერთშელაპარაკების ნიადაგზე, ცივი იარაღის გამოყენებით, თანასოფლელი დაჭრა, შემთხვევის დროს დაზიანება მიიღო კიდევ ერთმა პირმა.
  • ბრალდებულები, ცივი იარაღისა და სანადირო თოფის დემონსტრირებით ადგილობრივებს სიცოცხლის მოსპობითაც დაემუქრნენ.

გუშინ, 12 ივნისს, პოლიციამ დააკავა დიკო ბჟალავა, მოძრაობა ბალდის კანიონის შესანარჩუნებლად წევრი.

  • გამოძიება სისხლის სამართლის კოდექსის 151-ე მუხლით მიმდინარეობს, რაც მუქარას გულისხმობს.
  • მოძრაობის თქმით, ბჟალავა დააკავეს, ბალდის კანიონის მცველების კარავში თავდასხმაში ბრალდებულის ცოლის საჩივრის საფუძველზე.