აშშ-ში, აიდაჰოს შტატის ერთ-ერთ სკოლაში ცოტა ხნის წინ გამოსაშვები ცერემონია გაიმართა. კურსდამთავრებულებს ღონისძიებაზე სასწავლო დაწესებულების და სასკოლო ოლქის წარმომადგენლებმა გადასცეს ატესტატები.

თუმცა, ერთ-ერთმა კურსდამთავრებულმა, ანაბელ ჯენკინსმა, სასკოლო ოლქის დირექტორისთვის ხელის ჩამორთმევაზე პროტესტის ნიშნად უარი განაცხადა და სანაცვლოდ მას ბიბლიოთეკაში აკრძალული წიგნი, მარგარეტ ეტვუდის მხევლის წიგნის გრაფიკული ვერსია, მიაწოდა.

გასული წლის მიწურულს ეს გამოცემა ერთ-ერთი იყო იმ ათი წიგნიდან, რომელიც ადგილობრივი სკოლების ბიბლიოთეკებიდან ამოიღეს. სასკოლო ოლქის ადმინისტრაციამ მაშინ განაცხადა, რომ წიგნებში წარმოდგენილი "ნატურალისტური სურათები" მოსწავლეებისთვის შეუფერებელი იყო.

"მივხვდი, რომ არ მინდოდა, სცენაზე ავსულიყავი, ატესტატი მიმეღო და დირექტორისთვის ხელი ჩამომერთმია", — აცხადებს ჯენკინსი, — "ასე რომ, ავედი და წიგნი ამოვიღე, რომ ხალხს დაენახა. მან კი [დირექტორმა] ხელები გადაიჯვარედინა და წიგნი არ გამომართვა".

ფოტო: West Ada School District / YouTube

საბოლოოდ, სკოლის კურსდამთავრებულმა მხევლის წიგნის ეგზემპლარი დირექტორს ფეხებთან დაუტოვა და სცენიდან ჩავიდა.

ჯენკინსმა გამოსაშვები ღონისძიების ეს დასამახსოვრებელი მომენტი ტიკტოკზეც გამოაქვეყნა. მის ვიდეოს ამ დროისთვის 2,7 მილიონზე მეტი მოწონება აქვს.

ჯენკინსის თქმით, მხევლის წიგნით პირველად მაშინ დაინტერესდა, როცა გაიგო, როგორ ედავებოდა მასწავლებელი ბიბლიოთეკარს ამ თემაზე. მოსწავლემ შენიშნა, რომ მასწავლებელს წიგნი საერთოდ არ ჰქონდა წაკითხული.

უკვე კურსდამთავრებული ანაბელი ამბობს, რომ სამომავლოდ ინგლისური ლიტერატურის სწავლა სურს. მისი თქმით, ყურადღების ცენტრში ყოფნა არ მოსწონს, მაგრამ ჩათვალა, რომ ცენზურაზე ყურადღების გამახვილება აუცილებელი იყო.

ამერიკის პენცენტრის ცნობით, ქვეყანაში წიგნების აკრძალვის ტენდენცია მზარდია. ორგანიზაციის ინფორმაციით, მხოლოდ გასული წლის მეორე ნახევარში 23 შტატში და 53 სასკოლო ოლქში წიგნების აკრძალვის 4 349 შემთხვევა აღირიცხა. აკრძალულ წიგნებს შორის ჭარბობს ლგბტქ და არათეთრკანიანი ავტორების ნამუშევრები, ან ნაწარმოებები ამ თემაზე.

დისტოპიური რომანი მხევლის წიგნი, რომელიც 1985 წელს გამოიცა, თეოკრატიულ, ტოტალიტარულ რეჟიმში მცხოვრები, უფლებაჩამორთმეული ქალების შესახებ გვიყვება. იმის მიუხედავად, რომ ბოლო ათწლეულებში რომანის აკრძალვა არაერთხელ უცდიათ, მისი პოპულარობა არ განელებულა. 2017 წელს Hulu-ზე ნაწარმოების მიხედვით გადაღებული გახმაურებული სერიალის ჩვენებაც დაიწყო.

ასევე იხილეთ: