სომხეთის მესამე პრეზიდენტი სერჟ სარგსიანი 2013 წელს, სახელმწიფოსგან 489 მილიონი დრამის (1.3 მილიონი დოლარი) გაფლანგვის საქმეზე გამართლდა.

სარგსიანი ბრალდებებს უარყოფს. საქმეს მისმა რესპუბლიკურმა პარტიამ პოლიტიკურად მოტივირებული უწოდა.

ბრალის დამტკიცების შემთხვევაშიც კი, სარგსიანს პატიმრობა არ ემუქრებოდა, ხანდაზმულობის ვადის გასვლის გამო.

"არ ვარ ძალიან ბედნიერი ამ გადაწყვეტილებით, ან სხვა გადაწყვეტილება რომ ყოფილიყო, ტრაგიკული იქნებოდა ჩემთვის... ასევე, იმის გათვალისწინებით, რომ ხანდაზმულობის ვადა დიდი ხნის წინ იყო გასული, ჩემთვის ამას, პირველ რიგში, მორალური ღირებულება აქვს”, — განუცხადა სარგსიანმა ჟურნალისტებს სასამართლო სხდომის დასრულების შემდეგ.

სარგსიანმა თქვა, რომ ის ელოდება, რომ პროკურორები გაასაჩივრებენ გადაწყვეტილებას და მოუწოდებს მხარდამჭერებს, არ ეგონოთ, რომ სომხეთის სასამართლო სისტემა დამოუკიდებელია.

"ერთი, ორი, სამი თუ ოთხი მოსამართლის მიერ გამოტანილი განაჩენები არ არის საკმარისი იმისათვის, რომ განსაზღვროს, არის თუ არა სამართლიანობა თავის სიმაღლეზე ჩვენს ქვეყანაში“,— თქვა მან.

სარგსიანს ბრალად ედებოდა სახელმწიფო ფულის გაფლანგვა, სოფლის მეურნეობის დახმარების პროგრამის საშუალებით, რომელიც ფერმერებს იაფი ბენზინით ამარაგებდა. საქმის მიხედვით, ის საწვავის მიმწოდებლის სამთავრობო ტენდერში ჩაერია.

სარგსიანს, ასევე, წაუყენეს ბრალი სახელმწიფოს კუთვნილი თვითმფრინავის არასათანადო გამოყენებაში, მაგრამ ეს ბრალდებები გასული წლის სექტემბერში მოიხსნა.

2018 წლის ხავერდოვანი რევოლუციის შემდეგ ბრალი წაუყენეს უამრავ მაღალჩინოსანს; ბრალდებულთა შორის არის ყოფილი პრეზიდენტი რობერტ ქოჩარიანიც, რომელსაც 2008 წელს "კონსტიტუციური წესრიგის დამხობის“ ბრალდებით ასამართლებდნენ, რის შედეგადაც 10 ადამიანი დაიღუპა. ეს ბრალდებები 2021 წელს მოიხსნა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.