2024 წლის თებერვალში, Mastercard-ის ფინანსური განათლების პროექტი სამცხე-ჯავახეთში დაიწყო. უნიკალური საგანმანათლებლო პროექტი შექმნილია პროგრამის ერთიანობა მრავალფეროვნებაშია ფარგლებში, რომელიც ხორციელდება საქართველოს გაეროს ასოციაციის მიერ (UNA Georgia), აშშ-ის საერთაშორისო განვითარების სააგენტოს ფინანსური მხარდაჭერით.

პროექტის უნიკალურობა იმაში მდგომარეობს, რომ მისი მთავარი სამიზნე აუდიტორია ეთნიკური და რელიგიური უმცირესობებით დასახლებული რეგიონებია: სამცხე-ჯავახეთი, ქვემო ქართლი, კახეთი და მაღალმთიანი აჭარა. ეს რეგიონები აწყდებიან მათი გარემოსთვის დამახასიათებელ უნიკალურ გამოწვევებს, მათ შორის ენობრივ ბარიერებს, კულტურულ თავისებურებებსა და ფინანსურ განათლებაზე შეზღუდულ წვდომას. ფინანსური განათლების პროგრამა კი, სწორედ ამ დაბრკოლებების გადალახვას ისახავს მიზნად.

პროექტმა სტარტი სამცხე-ჯავახეთში, საბაზისო ფინანსური განათლების მოდულით აიღო, რომელიც სპეციალურად სტუდენტებისა და სკოლის მოსწავლეებისთვის შეიქმნა. 3 კვირის განმავლობაში, სასწავლო პროგრამას 100-ზე მეტი მონაწილე დაესწრო. მათ მიიღეს ინფორმაცია ფინანსების, ბიზნესის, მარკეტინგისა და ინოვაციების შესახებ და უპასუხეს მთავარ კითხვას - როგორ აქციონ იდეები რეალობად, დაიწყონ საკუთარი ბიზნესი და მიიღონ ფინანსური სარგებელი.

საბაზისო ფინანსური განათლების მოდულის დასრულების შემდეგ, საგანმანათლებლო რესურსების ხელმისაწვდომობის გასაზრდელად, სამცხე-ჯავახეთის სახელმწიფო უნივერსიტეტში, საქართველოს ეროვნული ბანკის, USAID-ისა და საქართველოს გაეროს ასოციაციის მხარდაჭერით, Mastercard-ის ფინანსური განათლების კუთხე გაიხსნა. პროექტის ფარგლებში, ფინანსური განათლების კუთხის გახსნა, ყველა რეგიონში იგეგმება.

ფინანსური განათლების პროექტში ლიბერთიც ჩაერთო და Mastercard-თან თანამშრომლობის მემორანდუმი გააფორმა. ფინანსური ინსტიტუციების წარმომადგენლები, ეთნიკურ და რელიგიური უმცირესობებს, სპეციალურად მათთვის შექმნილ საბანკო პროდუქტებს — სესხებს სეზონური გადახდის გრაფიკით, საშეღავათო პერიოდებსა და ბიზნეს ბარათებს სთავაზობენ.

სამცხე-ჯავახეთის შემდეგ, პროექტის ფოკუსმა ქვემო ქართლისკენ გადაინაცვლა - ბიზნეს მენეჯმენტის და ფინანსების მოდული მიკრო, მცირე და საშუალო მეწარმეებისთვის (MSMEs) მარნეულში, დემოკრატიული ჩართულობის ცენტრში ჩატარდა. 3 კვირის განმავლობაში, 100-მდე მონაწილე გაეცნო ბიზნესის მენეჯმენტთან და ფინანსებთან დაკავშირებულ თემებს - სტრატეგიული დაგეგმვის, მარკეტინგის, ოპერაციების, ფინანსებისა და ადამიანური რესურსების მიმართულებით. ეს მათ საშუალებას მისცემს შეიმუშაონ ეფექტური ბიზნეს გეგმები, გათვალონ და სწორად დაგეგმონ თავიანთი ბიზნესის განვითარება და განახორციელონ წარმატებული მარკეტინგული სტრატეგიები, რომლებიც სპეციფიკურია მათი უნიკალური გარემოებების გათვალისწინებით.

Mastercard-ის ფინანსური განათლების პროექტში ჩაერთო საქართველოს ეროვნული ბანკიც, რომლის ერთ-ერთი მთავარი პრიორიტეტი, სწორედ ფინანსური განათლების ამაღლება. წლების განმავლობაში, ამ მიმართულებით, ეროვნულმა ბანკმა არაერთი პროექტი თუ აქტივობა განახორციელა. ამჯერად კი, მარნეულის აუდიტორიას, საინტერესო, ინფორმაციულ და რაც მთავარია, მათ საჭიროებებზე მორგებული ლექციები შესთავაზა.

2024 წლის ივნისიდან, Mastercard-ის ფინანსური განათლების პროექტი კახეთში, შემდეგ კი მაღალმთიან აჭარაში გაგრძელდება. ამ რეგიონებში, პროექტი ქალი მეწარმეების გაძლიერებაზე იქნება ორიენტირებული. პარალელურად, გამოიცემა ფინანსური ტერმინების განმარტებითი ლექსიკონი აზერბაიჯანულ და სომხურ ენებზე და ფინანსური განათლების მიღება, კიდევ უფრო ხელმისაწვდომი გახდება. პროექტი 2024 წლის ნოემბრამდე გაგრძელდება და მთელი საქართველოს ტერიტორიას დაფარავს.