რა ხდება: საქართველოს პრემიერ-მინისტრი, ირაკლი კობახიძე, ეხმაურება არასამთავრობო ორგანიზაციების განცხადებას, რომლის მიხედვით, ისინი, რუსული კანონის წინააღმდეგ, საკონსტიტუციო და ადამიანის უფლებათა ევროპულ სასამართლოში საჩივრის წარსადგენად ემზადებიან.

  • კობახიძე იმედს გამოთქვამს, რომ სტრასბურგის სასამართლო პოლიტიკური გავლენის ქვეშ არ მოექცევა.

დეტალები: ჟურნალისტის კითხვას, იმ შემთხვევაში თუ ევროპული სასამართლო კანონის შეჩერების გადაწყვეტილებას მიიღებს, გაიზიარებენ თუ არა ამ გადაწყვეტილებას, კობახიძემ უპასუხა, რომ რუსული კანონის ინიციირებამდე, შეისწავლეს სტრასბურგის პრაქტიკა:

  • "საქართველოს პარლამენტის მიერ მიღებული კანონი თავიდან ბოლომდე შესატყვისობაშია სტრასბურგის პრაქტიკასთან", — თქვა კობახიძემ.

კონტექსტი: დღეს, 30 მაისს, არასამთავრობო ორგანიზაციებმა განაცხადეს, რომ რუსული კანონის წინააღმდეგ ამზადებენ სარჩელს, საქართველოს საკონსტიტუციო სასამართლოში წარსადგენად.

  • "პარალელურად, ვემზადებით ადამიანის უფლებათა ევროპულ სასამართლოში საჩივრის წარსადგენად, რომელსაც მივმართავთ შესაბამის დროს", — თქვეს მათ.

გაიგე მეტი: არასამთავრობოები გეგმავენ, მიმართონ სარჩელით საკონსტიტუციო სასამართლოს, საჩივარს ამზადებენ სტრასბურგისთვისაც

  • 28 მაისს, მას შემდეგ რაც საპარლამენტო უმრავლესობამ, პრეზიდენტ სალომე ზურაბიშვილის ვეტო რუსულ კანონზე, დაძლია, არასამთავრობო ორგანიზაციებმა განაცხადეს, რომ არ დაემორჩილებიან რუსულ კანონს.