მოკლედ: თბილისში საზაფხულო ბაღების რაოდენობა 45-დან 50-მდე გაიზრდება და 18 000-მდე აღსაზრდელს მოემსახურება.

  • ამის შესახებ თბილისის მერმა კახა კალაძემ დღეს, 22 მაისს, თბილისის მუნიციპალიტეტის მთავრობის სხდომაზე განაცხადა.

დეტალები: საზაფხულო ბაღებში რეგისტრაცია ელექტრონულად იქნება შესაძლებელი kids.org.ge -ზე. რეგისტრაცია დაიწყება 5 ივნისს, 10:00 საათზე და ივნისის ბოლომდე გაგრძელდება.

  • ბაღებში ჩაირიცხებიან თბილისის ბაღებში რეგისტრირებული, 2- დან 6 წლამდე ასაკის აღსაზრდელები, მათ შორის ისინი, ვინც სექტემბერში სკოლებში მიდიან.

კალაძის თქმით, 2024 წელს 50 საბავშვო ბაღში, 3 100-მდე თანამშრომელი იმუშავებს, ხოლო პროექტი 2024 წლის ბიუჯეტიდან 6 მილიონამდე ლარით დაფინანსდება.

  • "საბავშვო ბაღები შერჩეულია გეოგრაფიული პრინციპით, რათა აღნიშნული მომსახურება თბილისის ყველა უბნის მცხოვრებლებისთვის თანაბრად ხელმისაწვდომი იყოს", — თქვა კახა კალაძემ.
  • მისივე თქმით, საბავშვო ბაღებში დასაქმებული თანამშრომლები, საზაფხულო ბაღებში მუშაობისთვის გაორმაგებულ ანაზღაურებას მიიღებენ.

ბოლო ხაზი: საზაფხულო ბაღების ჩამონათვალი ხელმისაწვდომია თბილისის საბავშვო ბაგა-ბაღების მართვის სააგენტოს ვებგვერდზე.