მოკლედ: პარლამენტის შენობა დატოვეს ქართული ოცნების საპარლამენტო უმრავლესობის დეპუტატებმა მას შემდეგ, რაც რუსული კანონის მიღებას მესამედ და საბოლოოდ დაუჭირეს მხარი. ახლა ის ხელმოსაწერად საქართველოს პრეზიდენტს გადაეგზავნება, რომელიც ამბობს, რომ რუსულ კანონს ვეტოს დაადებს. საპარლამენტო უმრავლესობა კი აცხადებს, რომ ვეტოს დაძლევს.

აქ არის 84 დეპუტატის სია, რომლებმაც ხმა მისცეს რუსულ კანონს, მესამე მოსმენით.

ოპოზიციონერი დეპუტატის, ანა ნაცვლიშვილის მიერ, პარლამენტის შენობიდან გადაღებულ ვიდეოებში ჩანს, რა ვითარებაა საკანონმდებლო ორგანოს შიდა ეზოში: იქ არის მობილიზებული დიდი რაოდენობით სპეცრაზმი, ასევე, წყლის ჭავლის მანქანა.

"გაძურწვაი საკვირველი", — ისმის ვიდეოში ანა ნაცვლიშვილის რეპლიკა.

მას შემდეგ, რაც საპარლამენტო უმრავლესობამ რუსულ კანონს მესამე, ბოლო მოსმენით დაუჭირა, საკანონმდებლო შენობაში უსაფრთხოების წითელი დონე ამოქმედდა.

  • პარლამენტის მიერ გავრცელებულ განცხადებაში ნათქვამია, რომ წითელი დონე 17 საათიდან იმოქმედებს, გაუქმების ვადა მითითებული არ არის.
  • წითელი დონე ნიშნავს იმას, რომ საქართველოს პარლამენტში არ დაიშვება არცერთი პირი, გარდა პარლამენტის აპარატის უფროსის მიერ საფრთხის სპეციფიკისა და მისი თავიდან აცილების საჭიროების შესაბამისად განსაზღვრული პირებისა.

საკანონმდებლო ორგანოს შენობის წინ ხალხმრავალი საპროტესტო აქციაა. პოლიციამ აქციის რამდენიმე მონაწილე დააკავა და მედია ამბობს, რომ ისინი პარლამენტის ეზოში შეჰყავთ.