მოკლედ: შსს-მ თავისუფლების მოედანზე საპოლიციო ძალების დამატებითი მობილიზება დაიწყო. ადგილზე განათავსეს წყლის ჭავლის დამატებითი მანქანებიც.

  • სპეცრაზმელები არიან ეკიპირებულები და შესაძლებელია, ისინი გაემართონ პარლამენტის შესასვლელებისკენ.
  • თავისუფლების მოედანზე აქციის დასაწყისშივე განალაგეს 6 დიდი ზომის ავტობუსი, რომელშიც განსაკუთრებულ დავალებათა დეპარტამენტის წარმომადგენლები იმყოფებიან.
  • ამის პარალელურად, პარლამენტის შენობასთან მშვიდობიანი საპროტესტო აქცია მიმდინარეობს.
  • აქციის ზოგი მონაწილე ამ მომენტში პარლამენტის შენობის უკანა მხარეს მიემართება.
  • საპოლიციო ძალები პარლამენტის უკანა შესასვლელთანაც არიან განლაგებულები.

12 მაისს გამართულ ბრიფინგზე შს მინისტრმა თქვა, რომ პარლამენტის ბლოკირების შემთხვევაში, აქციის მონაწილეებს სისხლის სამართლის მუხლით დააკავებენ, რაც 4-წლიან პატიმრობას გულისხმობს.

  • მისი განცხადებიდან მალევე, თავისუფლების მოედანზე დიდი ოდენობით სპეციალური საპოლიციო ძალების მობილიზება დაიწყო.
  • შსს-მ სპეცრაზმი განალაგა უშუალოდ პარლამენტის შენობის შიდა ეზოშიც და ასევე, სახელმწიფო უსაფრთხოების სამსახურის ეზოში.
  • სამართალდამცველებმა შეადუღეს პარლამენტის გვერდითა ქუჩებზე გასასვლელი ჭიშკრებიც.

დღესვე, სპეციალური ბრიფინგი გამართა ანტიდასავლური განცხადებებით გამორჩეულმა საქართველოს პრემიერ-მინისტრმა, ირაკლი კობახიძემ. მან თქვა, რომ ხვალ და ზეგ საქართველოს პარლამენტი, რუსული კანონის მიღებით "აღასრულებს ქართული საზოგადოების ნებას."