უჩა აბაშიძე პოლიციელების მხრიდან ფსიქოლოგიურ ზეწოლასა და სიტყვიერ შეურაცხყოფაზე საუბრობს

მოკლედ: სახალხო დამცველის აპარატის ინფორმაციით, გასული ღამის განმავლობაში, მათ 8 პირი მოინახულეს, მათ შორის ბლოგერი უჩა აბაშიძე, რომელიც პოლიციის მხრიდან ფსიქოლოგიურ ზეწოლასა და სიტყვიერ შეურაცხყოფაზე მიუთითებდა.

"აღნიშნულ ფაქტთან დაკავშირებით, ინფორმაცია უკვე მიეწოდა სპეციალურ საგამოძიებო სამსახურს".

დეტალები: სახალხო დამცველის აპარატი წერს, რომ უჩა აბაშიძე, სახლის ჩხრეკის პერიოდში, სისტემატურად ითხოვდა ადვოკატების შეშვებას, თუმცა, უშედეგოდ.

აპარატი აღნიშნავს, რომ აბაშიძეს დაუყოვნებლივ უნდა მიეცეს ადვოკატთან შეხვედრის შესაძლებლობა.
მათივე თქმით, ისინი შეისწავლიან ადვოკატის საქმიანობისთვის ხელშეშლის ფაქტის ეპიზოდსაც.

ასევე, სახალხო დამცველის აპარატის მიხედვით, არასათანადო მოპყრობაზე საუბრობდა დაკავებულთა ნაწილიც: "სახალხო დამცველის აპარატი კვლავ აგრძელებს დაკავებულთა მოძიებასა და მათთან გასაუბრებას, მათი ფიზიკური მდგომარეობისა და დაკავების პირობების შესახებ ინფორმაციის მისაღებად".

კონტექსტი: ბლოგერი და რუსული კანონის მოწინააღმდეგე უჩა აბაშიძე გასულ ღამეს დააკავეს.

გამოძიება მიმდინარეობს მუხლით, რომელიც იარაღის უკანონო შეძენა-შენახვას გულისხმობს.

პოლიცია უჩა აბაშიძის საცხოვრებელ სახლში 9 მაისის საღამოს, 20:00 საათის შემდეგ შევიდა ჩხრეკის მიზნით, თუმცა მას არ მისცეს უფლება, გამოეყენებინა ტელეფონი და დაკავშირებოდა ადვოკატს.
უჩა აბაშიძესთან არ უშვებდნენ არც ოჯახის წევრებს.
არ შეუშვეს არც ადვოკატი, რომელიც მალევე მივიდა ადგილზე მას შემდეგ, რაც მედიით გახდა ცნობილი აბაშიძის სახლში პოლიციელთა მისვლის შესახებ.
"ადგილზე მისულია არასამთავრობო ორგანიზაციების სამართლებრივი დახმარების ქსელის ადვოკატი, რათა დაიცვას უჩა აბაშიძის ინტერესები და დაესწროს საგამოძიებო მოქმედებებს, თუმცა, უწყება არ აძლევს მას ბინაში შესვლის და მისი დაცვის ქვეშ მყოფ პირთან შეხვედრის შესაძლებლობას. აღნიშნული ცალსახად წარმოადგენს ამ პირის დაცვის უფლების შეზღუდვას, რაც წარმოადგენს სისხლის სამართლის დანაშაულს", — განაცხადა საქართველოს ახალგაზრდა იურისტთა ასოციაციამ.

მსგავსი: უჩა აბაშიძის სახლში ამოღებული იარაღი, ძირითადად, სათამაშოა, ტყვიები კი პლასტმასის — ლია თოდუა

მას შემდეგ, რაც უჩა აბაშიძე სამართალდამცავებმა საცხოვრებელი სახლიდან გაიყვანეს, მისმა მხარდამჭერებმა აბაშიძიდან ჭავჭავაძის გამზირზე გადაინაცვლეს, სადაც პოლიციამ რამდენიმე მოქალაქე დააკავა.