რა ხდება: რუსული კანონის მოწინააღმდეგე ბლოგერისა და სამხედრო მიმომხილველის, უჩა აბაშიძის საცხოვრებელ სახლში პოლიცია იმყოფება, თუმცა პოლიცია მას ადვოკატთან კომუნიკაციის შესაძლებლობას არ აძლევს. ფაქტთან დაკავშირებით, განცხადებას ავრცელებს საქართველოს ახალგაზრდა იურისტთა ასოციაცია (საია).

  • ორგანიზაცია მოუწოდებს სამართალდამცავ ორგანოებს, დაუყოვნებლივ მისცეს ადვოკატს საგამოძიებო მოქმედებებზე დასწრების და მისი დაცვის ქვეშ მყოფთან შეხვედრის შესაძლებლობა;
  • მიეცეს საშუალება საქართველოს სახალხო დამცველსა და ადვოკატთა ასოციაციას, შეისწავლოს ადვოკატის საქმიანობისთვის ხელშეშლის ფაქტი და მოახდინოს მასზე შესაბამისი რეაგირება.

საიას განცხადება: "ადგილზე მისულია არასამთავრობო ორგანიზაციების სამართლებრივი დახმარების ქსელის ადვოკატი, რათა დაიცვას უჩა აბაშიძის ინტერესები და დაესწროს საგამოძიებო მოქმედებებს, თუმცა, უწყება არ აძლევს მას ბინაში შესვლის და მისი დაცვის ქვეშ მყოფ პირთან შეხვედრის შესაძლებლობას.

  • აღნიშნული ცალსახად წარმოადგენს ამ პირის დაცვის უფლების შეზღუდვას, რაც წარმოადგენს სისხლის სამართლის დანაშაულს."

რა ვიცით:

  • 22:45 საათი: უჩა აბაშიძე დააკავეს. ის პოლიციამ ბინიდან მხარდამჭერების შეძახილების ფონზე გაიყვანა.
  • 22:40 საათი: სამართალდამცავებმა უჩა აბაშიძის საცხოვრებელი ბინიდან დალუქული ნივთები, მათ შორის, სავარაუდოდ, კომპიუტერული ტექნიკა გაიტანეს.

დაახლოებით, 20:30 საათისთვის On.ge-სთვის ცნობილი გახდა, რომ უჩა აბაშიძის სახლში პოლიცია შევიდა. ის რუსული კანონის საწინააღმდეგო აქციების მონაწილეა.

  • ადგილზე მყოფი პოლიციელები ამბობენ, რომ "მიმდინარეობს საგამოძიებო მოქმედება", თუმცა მიზეზებზე არ საუბრობენ.
  • NEWS.On.ge-ს უწყების პრესსამსახურში უთხრეს, რომ დეტალებს დააზუსტებენ.

უჩა აბაშიძეს არ მიეცა ტელეფონის გამოყენებისა და ადვოკატთან დაკავშირების უფლება.

  • მასთან არ უშვებენ ოჯახის წევრებს.
  • ვრცელდება ინფორმაცია, რომ ჩხრეკის მიზნით, სამართალდამცავები მისი მეგობარი გოგოს სახლშიც იმყოფებიან.
  • შინაგან საქმეთა სამინისტრო უჩა აბაშიძის საცხოვრებელ სახლთან მეტი პოლიციელის მობილიზებას ახდენს.
  • აბაშიძის სახლთან, მხარდამჭერის ნიშნად, მოქალაქეები იკრიბებიან. მხარდაჭერის ნიშნად, ადგილზე მივიდნენ პოლიტიკოსებიც.