რა ხდება: საქართველოს პრეზიდენტის ინიციატივით, ათონელის ქუჩაზე ევროპის დღის აღსანიშნავი კონცერტი, ჭავჭავაძის გამზირზე განვითარებული პროცესების გამო შეწყდა.

  • ინფორმაციას პრეზიდენტის ადმინისტრაცია ავრცელებს.

დეტალები: კონცერტში მონაწილე მუსიკოსებმა LOUDspeakers-მა, ქვემეხმა და დაგდაგანმა სოლიდარობა გამოუცხადეს ჭავჭავაძის გამზირზე დაკავებულებს და აქციის მონაწილეებს.

  • "ახლა მივიღეთ ინფორმაცია, რომ საშინელება ხდება ქალაქში, ჭავჭავაძეზე და უბრალოდ, არალოგიკურად მიგვაჩნია ამ კონცერტის გაგრძელება. სამწუხაროდ, უნდა შევწყვიტოთ," — განაცხადა LOUDspeakers-მა.

რა მოხდა ჭავჭავაძეზე: ბლოგერ უჩა აბაშიძის დაკავების გამო მის ვაკეში, მის სახლთან, აბაშიძის ახლობლები და გულშემატკივრები მივიდნენ.

  • მას შემდეგ, რაც პოლიციამ უჩა აბაშიძე სახლიდან გამოიყვანა და დააკავა, მისმა მხარდამჭერებმა აბაშიძიდან ჭავჭავაძის გამზირზე გადაინაცვლეს.
  • თავდაპირველად პოლიცია აცხადებდა, რომ დააკავებდა მოქალაქეებს, რომლებიც გზას გადაკეტავდნენ, თუმცა, სამართალდამცავებმა მალევე დაიწყეს ტროტუარებზე მდგომი პირების დაკავებაც.