მოკლედ: შინაგან საქმეთა მინისტრი ვახტანგ გომელაური აცხადებს, რომ მაქსიმალურად ცდილობენ, რუსული კანონის საპროტესტო აქციებზე, არასრულწლოვანების მიმართ არ გამოიყენონ სპეციალური საშუალებები.

  • "ქართველები არ ვართ ბევრი, ცოტა ვართ ძალიან და ეს ჩვენი ახალგაზრდობაა და მაქსიმალურად ვცდილობთ, გავუფრთხილდეთ და არ გამოვიყენოთ ის საშუალებები, რისი გამოყენებაც შეგვიძლია კანონით", — განაცხადა გომელაურმა დღეს, 9 მაისს, ჟურნალისტებთან.

დეტალები: გომელაურის თქმით, ბოლო წლების განმავლობაში, აქციებზე, შინაგან საქმეთა სამინისტროს, თავისი შესაძლებლობების 20%-იც არ გამოუყენებია:

  • "ვცდილობთ, რომ არ გამოვიყენოთ შესაბამისი ძალები, ანუ მთლიანი ძალები, რაც შეიძლება გამოყენებულ იქნას კანონის ფარგლებში. წყლის ჭავლი იქნება, გაზი იქნება, მხუთავი აირი, წიწაკის სპრეი იქნება თუ რეზინის ტყვიები, სრული უფლება გვაქვს, კანონიერი, რომ ეს გამოვიყენოთ".

კონტექსტი: გუშინ, 8 მაისს, შინაგან საქმეთა სამინისტროს პოლიციის დეპარტამენტის დირექტორმა, თეიმურაზ კუპატაძემ განაცხადა, რომ რომ აქციებს საერთაშორისო სტანდარტებით შლიან.

  • მან მედიას აჩვენა ვიდეომასალა, სადაც სხვა ქვეყნების საპოლიციო ღონისძიებები ჩანს.
  • კუპატაძის მტკიცებით, პოლიციას საქართველოში ძალისთვის არ გადაუმეტებია.

"ვაფრთხილებთ აქციის ყველა მონაწილესა და ორგანიზატორს, იმ დროს როდესაც პოლიცია კანონის შესაბამისად დაიწყებს აქციის მონაწილეთა ძალადობრივი ქმედებების აღკვეთას, გამოყენებული იქნება მკაცრი ზომები, ისევე როგორც ამერიკის და ევროპის წამყვან ქვეყნებშია მიღებული", — თქვა კუპატაძემ.

მსგავსი: სუს-მა რუსული კანონის საწინააღმდეგო მშვიდობიანი დემონსტრაციების შესახებ განცხადება გაავრცელა

ბოლო ხაზი: ხელისუფლებამ მშვიდობიანი აქციები, პარლამენტის მიმდებარე ტერიტორიაზე, არაერთხელ დაარბია.

  • მხუთავ აირს, ხშირ შემთხვევაში, ყოველგვარი გაფრთხილების გარეშე იყენებდნენ.
  • მედიასაშუალებებმა დააფიქსირეს არაერთი შემთხვევა, როდესაც სპეცრაზმის მონაწილეები განსაკუთრებული აგრესიით გამოირჩეოდნენ, აქციის მონაწილეების მიმართ.

გაიგე მეტი: 8-9 მაისს აქციების მონაწილე 6 ადამიანი დააკავეს