ოკუპირებული სამხრეთ ოსეთის წარმომადგენელი, მურატ ჯიოევი აცხადებს, რომ ქართველი აქტივისტების დაანონსებული აქცია ამავე რაიონებში გამართული "დესტრუქციული მიტინგების გაგრძელებაა". მისივე თქმით, სასაზღვრო ბანერების განთავსება მხოლოდ სამხრეთ ოსეთის ტერიტორიაზე მიმდინარეობს და მასში რუსი მესაზღვრეები არ მონაწილეობენ:

"რუსი მესაზღვრეები სამხრეთ ოსეთში რუსეთის ფედერაციასთან დადებული ორმხრივი შეთანხმების ფარგლებში არიან და სახელმწიფო საზღვარს იცავენ. საზღვრის დადგენის პროცესში არ მონაწილეობენ. ასე რომ, მათ მიმართ გამოთქმული ბრალდებები პროპაგანდისტული პროვოკაციაა, რომელიც პირველ რიგში საერთაშორისო საზოგადოებაზეა გათვლილი."

რუსული სახელმწიფო მედიის, Sputnik-ის ინფორმაციით, ჯიოევი ადმინისტრაციულ საზღვართან ქართველი აქტივისტების პატრულირების გამო, სიტუაციის შესაძლო გამწვავებაზე პასუხისმგებლობას ქართულ მხარეს აკისრებს:

"დღეს დაანონსებული აქციის მსგავსი დემონსტრაციები სასაზღვრო რაიონებისთვის საკმაოდ სახიფათოა. შესაძლო პროვოკაციების შემთხვევაში პასუხისმგებლობა ქართულ მხარეს ეკისრება."

ჯიოევის თქმით, თვის დასაწყისში, როცა ბერშუეთში, ე.წ. საზღვრის გადმოწევის გამო, აქციები ეწყობოდა, ევროკავშირის დამკვირვებელთა მისია საქართველოში სპეციალური განცხადებით გმოვიდა, სადაც ნათქვამი იყო, რომ ბანერები საქართველოს ტერიტორიაზე არ დადგმულა.

ივლისის დასაწყისში სოფელ ბერშუეთში, ოკუპაციის ხაზთან სამხრეთ ოსეთის საზღვრის აღმნიშვნელი ახალი ბანერები გაჩნდა.