ევროპული საქართველოს ლიდერი, გიგა ბოკერია მიიჩნევს, რომ საქართველოს ხელისუფლება სტრასბურგის სასამართლოში წარდგენილი კანდიდატები სამარცხვინო მდგომარეობაში აყენებენ ქვეყანას. ეს განცხადება ბოკერიამ სტრასბურგის სასამართლოს მიერ საქართველოდან წარდგენილი მოსამართლეობის ორი კანდიდატის დაწუნებას მოჰყვა.

"ქართული ოცნება, [ბიძინა] ივანიშვილის გუნდი, [თეა] წულუკიანი მრავალმხრივ ზიანს აყენებს საქართველოს. იმ სტრუქტურაში, რომელიც უნდა იყოს მთავარი გარანტი ჩვენი მოქალაქეების უფლებების დაცვის, იმ თანამდებობაზე, რომელიც უნდა იყოს ამ ძალიან მნიშვნელოვან სტრუქტურაში, ევროპის სასმართლოში საქართველოს სახე", - აღნიშნა ბოკერიამ.

საქართველოს იუსტიციის მინისტრის, თეა წულუკიანი ინფორმაციით, საქართველოდან სტრასბურგის ადამიანის უფლებათა სასამართლოს მოსამართლის პოსტზე წარდგენილი სამი კანდიდატიდან, შესარჩევმა კომისიამ მოიწონა მხოლოდ ლადო ჭანტურიას კანდიდატურა.

როგორც წულუკიანი ამბობს, მოსამართლეობის სხვა კანდიდატებმა - შოთა გეწაძემ და სოფიო ჯაფარიძემ - მიიღეს დადებითი შეფასებები თუმცა, შესარჩევმა კომისიამ მიიჩნია, რომ მათ საკმარისი პროფესიული გამოცდილება არ აქვთ. შესაბამისად, საქართველოს მთავრობამ კონკურსზე ორი კანდიდატი ხელახლა უნდა წარადგინოს, რადგან, საბოლოოდ, არჩევანი სამ კანდიდატს შორის უნდა შეჩერდეს.

2016 წლის სექტემბერში ევროსასამართლოს მოსამართლეთა კომიტეტის სხდომაზე საქართველოდან წარდგენილი მოსამართლეობის 3 კანდიდატიდან არცერთი დაამტკიცეს. ევროსასამართლოს მოსამართლეობის კანდიდატები ევა გოცირიძე, ალექსანდრე ბარამიძე და გიორგი ბადაშვილი იყვნენ. ამის გამო, საქართველოს მოსამართლეობის კანდიდატების შესარჩევად კონკურსის ჩატარება ახლიდან დასჭირდა.