მოკლედ: შინაგან საქმეთა სამინისტროს მიერ, მშვიდობიანი დემონსტრანტების წინააღმდეგ ძალის გამოყენების მიუხედავად, პარლამენტის შენობის წინ საპროტესტო აქცია ისევ გრძელდება.

  • იქ შეკრებილებს სცენაზე გამომსვლელები მიმართავენ. დემონსტრანტებს მიმართა ზაზა სარალიძემ, ხორავას ქუჩაზე მოკლული დათუნა სარალიძის მამა, რომელიც შიმშილობას აცხადებს იქამდე, ვიდრე ხელისუფლება რუსულ კანონს არ გაიწვევს.

ზაზა სარალიძის მიმართვა: "მინდა, თითოეული იმ ახალგაზრდის მშობელი ვიხილო აქ, ვინც ახლა პარლამენტთან დგას, იმიტომ, რომ დღეს კლავენ ჩვენი შვილების მომავალს, ევროპულ მომავალს, ჩვენს შვილებს უწოდებენ ყველანაირ უბინძურეს სიტყვებს.

  • არ შეიძლება ასე. ყველა დავდგეთ ფეხზე, ყველა, მთელი საქართველო, ამ რუსული რეჟიმის წინააღმდეგ.
  • ძირს რუსული კანონი, ძირს რუსული რეჟიმი, გაუმარჯოს ახალგაზრდებისა და ჩვენს ევროპულ მომავალს!"

რა მოხდა: როგორც ორგანიზატორები აცხადებენ, დაკავებულია აქციის დაახლოებით, 10 მონაწილე. დაკავებულთა რაოდენობაზე შინაგან საქმეთა სამინისტროს ოფიციალური ინფორმაცია ჯერ არ გამოუქვეყნებია.

  • საღამოს 20:00 საათიდან, რუსული კანონის საპარლამენტო განხილვის პარალელურად, პარლამენტის ყველა შესასვლელთან იმყოფებოდნენ დემონსტრანტები.
  • შინაგან საქმეთა სამინისტრომ გამოიყენა სპეციალური ძალა იმისთვის, რომ უზრუნველყოთ შენობიდან რუსული კანონის მხარდამჭერი ქართული ოცნების დეპუტატების გაყვანა.
  • პოლიციამ რამდენჯერმე გამოიყენა ე.წ. წიწაკის სპრეი და სავარაუდოდ, ცრემლსადენი გაზი.
  • დაშავდა ათობით მოქალაქე.
  • პარლამენტის შენობის ირგვლივ არ იყო მობილიზებული სასწრაფო-სამაშველო ბრიგადების საკმარისი რაოდენობა.
  • დაშავებულთა შორის არიან ჟურნალისტებიც.

ფოტო: დათო ქორიძე / რადიო თავისუფლება

ფოტო: დათო ქორიძე / რადიო თავისუფლება

ფოტო: დათო ქორიძე / რადიო თავისუფლება