შვეიცარიის მოქალაქეების უმრავლესობამ არჩევნებზე უარყო წინადადება, რომელიც მათ სტაბილური შემოსავლის სახით ყოველთვიურად 2,500 შვეიცარიულ ფრანკს ჰპირდებოდა, იმის მიუხედავად იმუშავებდნენ თუ არა.

BBC-ის ინფორმაციით, წინადადებას საზოგადოებაში 23% მომხრე და 77% მოწინააღმდეგე ჰყავდა.

იდეა შვეიცარიის ინტელექტუალური ჯგუფის ნაწილს ეკუთვნოდა. ავტორები მიიჩნევდნენ, რომ შემოსავლის არსებობის მიუხედავად, ადამიანებს მუშაობისა და სამსახურის შოვნის სურვილი მაინც ექნებოდათ.

წინადადება შვეიცარიის მთავრობას 208 მილიარდი შვეიცარული ფრანკი დაუჯდებოდა. მას მხარს არ უჭერდნენ არც მემარცხენე და არც მემარჯვენე პოლიტიკოსები.

შვეიცარიაში არჩევნებამდე ჩატარებული გამოკითხვის მიხედვით, საზოგადოების უმრავლესობა მიიჩნევდა, რომ წინადადების მიღების შემთხვევაში, ადამიანების უმრავლესობა მუშაობას შეწყვეტდა, 56% კი დარწმუნებული იყო, რომ ინიციატივა დღის სინათლეს ვერ იხილავდა.

დღევანდელი კურსით, 2,500 შვეიცარიული ფრანკი 2,294 ევროს და 2,595 ამერიკულ დოლარს შეადგენს.

ინიციატივის ავტორები მიიჩნევენ, რომ მოქალაქე ფინანსურად დამოკიდებული არ უნდა იყოს მხოლოდ დამსაქმებელზე და მას უნდა ჰქონდეს გარანტირებული შემოსავალი იმის მიუხედავად, აქვს თუ არა სამსახური.

ინიციატივის ავტორებს ასევე სურდათ, რომ სახელმწიფოს ყველა ბავშვისთვის 625 შვეიცარული ფრანკი (573 ევრო) გადაეხადა.