რა ხდება: თბილისის მერის, კახა კალაძის განცხადებით, საქართველოს ნაკრების ფეხბურთელების გზავნილები არის იგივე, რასაც ფიქრობს ყველა და რასაც კითხვის ნიშანი არ დაესმის. ამის შესახებ მედიასთან ისაუბრა დედაქალაქის მერმა, რომელიც ღიად ანტიდასავლურ განცხადებებს აკეთებს ხოლმე.

დეტალები: მისი თქმით, ქვეყნის მომავალი არის ევროპა და ევროპული ღირებულებებით ცხოვრება.

  • "სწორედ ეს კურსი აქვს არჩეული დღევანდელ ხელისუფლებას", ამბობს კალაძე იმის მიუხედავად, რომ ხელისუფლების ყველა მაღალჩინოსანი და მმართველი პარტიის, ქართული ოცნების დეპუტატები საჯაროდ აფიქსირებენ დასავლელი სტრატეგიული პარტნიორების საწინააღმდეგო პოზიციებს.
  • ქართული ოცნების ხელისუფლების პოლიტიკური კურსი აფერხებს საქართველოს ევროინტეგრაციის 30-წლიან პროცესს.

კალაძე: "ფეხბურთელების გზავნილები არის ის, რაც არის ჩვენი საერთო სულისკვეთება - ჩვენი მომავალი არის ევროპა. სწორედ ასე წარმოგვიდგენია ჩვენი ქვეყანა, რომ ევროპული ღირებულებებით ვიცხოვროთ. პირველ რიგში, ევროპა საქართველოში და აქ მინდა, ჩემი შვილებისთვის და მომავალი თაობებისთვის. ნურავის შერცხვება და შეეშინდება ამის თქმის, რომ ჩვენი მომავალი არის ევროპა."

კონტექსტი: საქართველოს ნაკრების ფეხბურთელები სოციალურ ქსელებში აქვეყნებენ პროევროპულ განცხადებებს. პოზიციების უმეტესობაში აღნიშნულია, რომ მხარს უჭერენ საქართველოს ევროპულ მისწრაფებებს, თუმცა, ფეხბურთელების გამოხმაურებებში არ არის დაგმობილი ხელისუფლების ანტიდასავლური კურსი.