საქართველოში რუსული კანონის დაინიცირებას ქართული წარმოშობის რუსული მწერალი ბორის აკუნინი, იგივე გრიგოლ ჩხარტიშვილი, სოციალურ ქსელში გამოეხმაურა. მან რუსული კანონი გააკრიტიკა და ქართველებს მოუწოდა, თავიანთი უფლებებისთვის იბრძოლონ.

"რამდენიმე ქართული ტელევიზია და საინფორმაციო საშუალება დამიკავშირდა და 'უცხოელი აგენტების' კანონზე აზრის გამოთქმა მთხოვა. ზოგადად, ქართულ პოლიტიკურ მოვლენებზე კომენტარს არ ვაკეთებ ხოლმე. უპირველეს ყოვლისა, იმის კომპლექსი მაქვს, რომ 'ნამდვილი ქართველი' არ ვარ — ქართული ენაც კი არ ვიცი. ამას გარდა, რუსი მწერალი ვარ და არსებული პოლიტიკური ვითარებიდან გამომდინარე, რუსეთის მხრიდან უცხო ქვეყნის საქმეში ნებისმიერი ჩარევა იმპერიალიზმის გამოვლინებად ჩაითვლება.

მაგრამ ჩემთვის საქართველო უცხო არაა, იქ დავიბადე, ჩემი გვარი "შვილით" მთავრდება, მამაჩემს კი შალვა ჰქვია. საქართველოში უამრავი მეგობარი და ნათესავი მყავს. ჩემთვის ძნელია იმის ყურება, როგორ ეფლობა დემოკრატიული ქვეყანა იმ ჭაობში, სადაც თავის დროზე რუსეთი ჩაეფლო.

ოპოზიციისა და კრიტიკული მედიის კი არა, პუტინიზმის უნდა გვეშინოდეს. არამხოლოდ გარედან შემოჭრის, არამედ ქვეყნის შიგნიდან შემოჭრის უნდა გვეშინოდეს და ახლა სწორედ ეს ხდება. პუტინიზმი თქვენს სახლში ბუდის დადებას თქვენივე ხელისუფლების ინიციატივით ცდილობს. ამ აგენტს მოგვიანებით ვეღარ გააძევებთ. შემდეგ კი, როცა საქართველოში მყუდროდ დაიდებს ბინას, მის მარტივად მოშორებას ვეღარ შეძლებთ. პუტინიზმი საქართველოს კიბოსავით შეჭამს. ეს უკვე კარგად ვიცით, აქამდეც გაგვივლია — ჯერ "უცხოური აგენტები", მერე "მეხუთე კოლონა", მერე "ტერორისტები და ექსტრემისტები" და საბოლოოდ, საქართველოს პუტინის რუსეთის გარდა არც ერთი მეგობარი ქვეყანა აღარ შერჩება.

კეთილი იყოს თქვენი დაბრუნება წარსულში, ორთავიანი არწივის ფრთის ქვეშ. ქართველებო, თქვენთვის ამის გაკეთების უფლება არ მისცეთ. იბრძოლეთ თავისუფლებისთვის", — წერს მწერალი.

2023 წელს რუსეთში ბორის აკუნინი ტერორისტებისა და ექსტრემისტების სიაში შეიყვანეს. მწერალი ღიად აკრიტიკებს პუტინის პოლიტიკას და გმობს რუსეთის უკრაინაში შეჭრას. ამჟამად ის დიდ ბრიტანეთში ცხოვრობს.

დღეს, 16 აპრილს პარლამენტი ხელისუფლების მიერ ხელმეორედ დაინიცირებულ რუსულ კანონს პლენარულ სხდომაზე პირველი მოსმენით უყრის კენჭს.

იხილეთ ასევე: