მოკლედ: პარტია ახალის ერთ-ერთი ლიდერი, ნიკა გვარამია აცხადებს, რომ ელჩები ირაკლი კობახიძესთან საპროტესტო ნოტით მივიდნენ.

  • ამის შესახებ გვარამია ფეისბუქზე წერს.

დეტალები: "სრული დასავლური დიპლომატიური დემარში: აშშ, ევროკავშირის და დიდი ბრიტანეთის ელჩები საპროტესტო ნოტით მივიდნენ პირდაპირ პრემიერ-მინისტრთან (და არა საგარეო საქმეთა მინისტრთან)", — წერს გვარამია.

მთავრობის ადმინისტრაციაში NEWS.On.ge-ს დაუდასტურეს ინფორმაცია, რომ ელჩები პრემიერთან ნამდვილად იმყოფებიან.

  • ადმინისტრაციაში დეტალებზე არ საუბრობენ, თუმცა არ გამორიცხავენ, რომ შესაძლოა, საუბარი რუსულ კანონპროექტსაც შეეხოს.

ჩვენს კითხვაზე, ხომ არ უკავშირდება ელჩების დღევანდელი ვიზიტი ირაკლი კობახიძის გუშინდელ განცხადებას, სადაც ელჩები კანონპროექტთან დაკავშირებით დებატებში გამოიწვია, მთავრობის ადმინისტრაციაში ამბობენ, რომ არა.

  • ამის დასტურად კი გვითხრეს, რომ შეხვედრა 1 კვირის წინ ჩაინიშნა, თუმცა ამ ინფორმაციის გადამოწმებას დიპლომატიურ უწყებებთან ვცდილობთ.

ბოლო ხაზი: დასავლელ სტრატეგიულ პარტნიორებთან შეხვედრამდე პრემიერ-მინისტრი ჩინეთის სახალხო რესპუბლიკის დელეგაციას შეხვდა.

  • ირაკლი კობახიძემ ჩინეთის სახალხო რესპუბლიკის დელეგაციას საქართველოს ტერიტორიული მთლიანობისა და სუვერენიტეტის მხარდაჭერისთვის მადლობა გადაუხადა და კიდევ ერთხელ გამოხატა მხარდაჭერა ერთიანი ჩინეთის პრინციპის მიმართ.