საქართველოს ბანკი ნიჭიერი და მიზანდასახული ახალგაზრდებისთვის განათლების შესაძლებლობების შექმნას განაგრძობს. სწორედ ამ მიზნით, 2020 წლიდან, ბანკი, Miami Ad School Europe-თან თანამშრომლობით, ნიკა გუჯეჯიანის სახელობის სასტიპენდიო პროგრამას ახორციელებს.

ინიციატივის ფარგლებში, კრეატიული ინდუსტრიით დაინტერესებულ ახალგაზრდებს აქვთ შესაძლებლობა, მიიღონ სწავლის 100%-იანი დაფინანსება გერმანიაში, ერთ-ერთ ყველაზე ცნობილ კრეატიულ სკოლაში — Miami Ad School Europe-ში პორტფოლიო პროგრამაზე სასწავლებლად.

საქართველოს ბანკისა და MASE-ს ინიციატივის ფარგლებში, ყოველწლიურად სტიპენდიის ერთი გამარჯვებული ვლინდება. შედეგად, ჯამში უკვე 4 სტიპენდიატი სწავლას გერმანიაში, ნიკა გუჯეჯიანის სახელობის სტიპენდიით აგრძელებს.

2023 წლის კონკურსის გამარჯვებული სოფი ივანიშვილი გახდა, რომელიც ბერლინში გაემგზავრა და ამჟამად Art Direction-ის მიმართულებით სწავლობს.

როგორც სოფი ამბობს, მაიამის სკოლის შესახებ მეგობრისგან გაიგო და იქაური თავგადასავლებითა და ამბებით შთაგონებულმა ბევრჯერ შეავსო აპლიკაცია, თუმცა 2023 წლის ივნისამდე გაგზავნას ვერ ბედავდა. როცა ეს ნაბიჯი გადადგა, პირველივე ცდაზე 160 აპლიკანტს აჯობა და ნიკა გუჯეჯიანის სახელობის სტიპენდია მოიპოვა.

მაიამის კრეატიულ სკოლაში სწავლისა და უცხო ქალაქში ცხოვრების გამოცდილებას ახლა სოფი სხვებს უზიარებს:

მოლოდინები:

"შემიძლია ვთქვა, რომ ყველა მოლოდინი გამიმართლდა. ვსწავლობ საგნებს, რომლებიც სულ მაინტერესებდა, მაგრამ დროს და სივრცეს ვერ ვპოულობდი, რომ მესწავლა. კურიკულუმი მრავალფეროვანია, 5 საგანს ვსწავლობთ, ხუთივე განსხვავებული და თანამედროვე კრეატიულ ინდუსტრიაში საჭირო საგანია. ბევრ საინტერესო ადამიანთან მიწევს ყოველდღიურად ურთიერთობა და ამ ურთიერთობითაც ბევრს ვსწავლობ. საერთო ინტერესების მქონე ადამიანებთან საუბარი, იდეების მიმოცვლა ზრდისა და განვითარების მნიშვნელოვანი ნაწილია."

სწავლის პროცესი:

"მაიამის სკოლაში საკმაოდ დატვირთული და ცოცხალი გრაფიკი გვაქვს. ყოველდღე გვაქვს ლექცია და დავალება, ანუ ყოველი ლექციის შემდეგ რაღაც ახალი და შენეული უნდა შექმნა. ტრადიციული სასწავლო მოდელისგანაც სწორედ ამით განსხვავდება — აქ სწავლება პრაქტიკულ ცოდნას ეფუძნება, თეორიებსაც სწავლობ, მაგრამ მთავარ გამოცდილებას შენივე იდეებზე მუშაობით იღებ. სწავლის დასრულების შემდეგ გრჩება არა მხოლოდ კარგი თეორიული ცოდნა, არამედ პორტფოლიო, რომელიც შეგიძლია მსოფლიოს წამყვან სააგენტოებში წარადგინო."

ბერლინი:

"არასდროს მიფიქრია, რომ უამინდო ბერლინი ჩემი ქალაქი იქნებოდა, მაგრამ იმაზე საინტერესო და მრავალფეროვანი აღმოჩნდა, ვიდრე წარმოვიდგენდი. აქ ყველას შეუძლია იპოვოს თავისი კუთხე, თითქოს ერთი ქალაქი ბევრ სხვადასხვა ქალაქს იტევს და აერთიანებს. განსაკუთრებით იმ ადამიანებისთვისაა საინტერესო, ვისაც კულტურა და ხელოვნება აინტერესებს, უყვარს კინო, მუსიკა, მუზეუმები, ფესტივალები. ქალაქსა და ახალ კულტურას ნელ-ნელა ვეცნობი, გარემოსთან ადაპტირებაც არ მიჭირს."

როგორც ამბობს, MASE-ს დასრულების შემდეგ სურს, თანამშრომლობა რომელიმე საერთაშორისო სააგენტოსთან გააგრძელოს კრეატიული მიმართულებით, თუმცა გამოცდილების მიღების შემდეგ კარიერის გაგრძელებას საქართველოში განიხილავს.

სოფი იმ ადამიანებს, რომლებიც ვერ ბედავენ ნაბიჯის გადადგმას, ურჩევს:

"საუკეთესო განცდაა, როდესაც საკუთარ შიშებს უსწორებ თვალს და კომფორტის ზონიდან გამოდიხარ, ამ დროს პოულობ ძალას, რომელიც არც გეგონა, რომ გქონდა, არავის და არაფერს დაუჯეროთ, რომ რამე არ შეგიძლიათ და საკმარისად კარგები არ ხართ."

საქართველოს ბანკი Miami Ad School Europe-თან უკვე 4 წელია თანამშრომლობს და ნიჭიერ ახალგაზრდებს ბერლინის საუკეთესო კრეატიულ სკოლაში 100%-იანი დაფინანსებით სწავლის შესაძლებლობას აძლევს.

ნიკა გუჯეჯიანის სახელობის სასტიპენდიო პროგრამაზე რეგისტრაცია მიმდინარეობს და 12 მაისს დასრულდება. აპლიკაციის შესახებ დეტალური ინფორმაციის მისაღებად ეწვიეთ ვებგვერდს.

სოფის ამბავი ამტკიცებს, რომ ყველა თავგადასავალი და წარმატება ცდითა და გამბედაობით იწყება. ამიტომ, გამოცადეთ საკუთარი შესაძლებლობები, არ გაჩერდეთ და გახსოვდეთ, რომ საუკეთესო წინ არის!