მოკლედ: პროკურატურის ინფორმაციით, დამამძიმებელ გარემოებებში მომხდარი განზრახ მკვლელობის, ჯგუფური ძალადობის და ცრუ ინფორმაციის მიწოდების ფაქტებზე, 4 პირს ბრალდება წარედგინა, 1 პირს კი ბრალდება დაუზუსტდა.

დეტალები: გამოძიების პირველ ეტაპზე, ბრალდება ოჯახის წევრის განზრახ მკვლელობისთვის, მოკლული კაცის ცოლს წარედგინა. თუმცა, დადგინდა, რომ 2 აპრილს, სამტრედიაში, საკუთარ სახლში, ოჯახური კონფლიქტის ნიადაგზე, დაზარალებულს სამმა პირმა, კერძოდ, ცოლის ძმებმა და ნათესავმა სცემეს.

  • დაზარალებული აპირებდა, რომ ამის შესახებ პოლიციისთვის ეთქვა, რის გამოც ცოლის ძმამ, მცირეწლოვანი შვილის თანდასწრებით, მრავლობითი დაზიანებები მიაყენა. კაცი ადგილზე გარდაიცვალა.
  • შემთხვევის ადგილზე მყოფმა კიდევ ორმა პირმა, მათ შორის მოკლულის ცოლმა, გამოძიებას ცრუ ინფორმაცია მიაწოდა.
  • გარდაცვლილის ცოლმა პირველ ჩვენებაში, ქმრის მკვლელობა დაიბრალა და თავად აღიარა.

სამართალდამცავებმა 4 პირი 5 აპრილს დააკავეს.

მოკლულის ცოლს ოჯახის წევრის განზრახ მკვლელობის მუხლით ბრალდება დაუზუსტდა და მას ბრალი წარედგინა, განსაკუთრებით მძიმე დანაშაულის საქმეზე, პირადი მოტივით ცრუ ინფორმაციის მიწოდებაზე.

  • მუხლი 3-დან 7 წლამდე პატიმრობას გულისხმობს.

ასევე, განზრახ მკვლელობაში ბრალდებულმა პირმა ჩადენილი დანაშაული აღიარა. მას ბრალი წარედგინა მუხლით, რომელიც გულისხმობს ჯგუფურად ცემას და განზრახ მკვლელობას, ჩადენილი სხვა დანაშაულის დაფარვის მიზნით, განსაკუთრებული სისასტიკით.

  • მუხლი 16-დან 20 წლამდე ან უვადო პატიმრობას ითვალისწინებს.

გარდა ამისა, ორ პირს ბრალდება წარედგინა მუხლით, რომელიც გულისხმობს ჯგუფურად ცემას და პირადი მოტივით ცრუ ინფორმაციის მიწოდებას, განსაკუთრებით მძიმე დანაშაულის საქმეზე.

  • კიდევ ერთ პირს ბრალდება წარედგინა მუხლით — ცრუ ინფორმაციის მიწოდება განსაკუთრებით მძიმე დანაშაულის საქმეზე, რაც 3-დან 7 წლამდე პატიმრობას ითვალისწინებს.