ახალი პოლიტიკური ცენტრის გირჩის ლიდერის ზურაბ ჯაფარიძის თქმით, საქართველოს ეკონომიკა გაჩერებულია და ამ მიმართულებით ქვეყანა არ ვითარდება.

"ბოლო მონაცემებით, იანვარში ქვეყნის ეკონომიკური ზრდა 0,8 %-ს შეადგენს. გასულ წელს ეს მაჩვენებელი 2,8% იყო. ეკონომიკური ზრდის ტემპი პრაქტიკულად 0-მდე ჩამოვიდა" - აღნიშნა მან.

ზურაბ ჯაფარიძის თქმით, საქართველოს ხელისუფლების წარმომადგენლები ცრუობდნენ, როდესაც აცხადებდნენ, რომ რეგიონში საქართველოს ყველაზე კარგი ზრდა ჰქონდა:

"ეს არაა სიმართლე. წინასწარი მონაცემების მიხედვით, სომხეთს აქვს ჩვენზე უკეთესი ეკონომიკური ზრდა. იანვარში ექსპორტმა 22%-ით იკლო, იმპორტმა კი 25%-ით. ზოგადად საგარეო ვაჭრობა 24%-ით არის შემცირებული".

ჯაფარიძის ინფორმაციით, ახლად დარეგისტრირებული საწარმოების რაოდენობა წინა წლის იგივე პერიოდთან შედარებით -18 %-ს შეადგენს:

"ადამიანები ბიზნესს აღარ იწყებენ. იანვარში ფასები 5,6%-ით გაიზარდა. მათ შორის, სურსათზე 5%-ით. ჯანდაცვა 11%-ით არის გაძვირებული. ლარს რაც დაემართა ბოლო 3 წლის განმავლობაში, ეს ყველა მოქალაქემ განიცადა. თუ გადახედავთ ბოლო 3 წლის მონაცემებს, ქართული ვალუტა 40-45%-ით არის გაუფასურებული".

ზურაბ ჯაფარიძემ ამ პრობლემებთან მიმართებაში ხელისუფლების მოქმედებები გააკრიტიკა:

"თებერვალში თითქმის 200 მილიონი ლარით მეტი გადასახდელი არის გაშვებული ხაზინიდან, ვიდრე შემოსავალია მიღებული. იმაზე მეტ ფულს ვხარჯავთ, ვიდრე ეკონომიკა იძლევა ამის საშუალებას. ჯერჯერობით არსებობს ნაშთი, რომელსაც ხელისუფლება იყენებს, მაგრამ ეს ნაშთი რომ ამოიწურება, სერიოზული პრობლემების წინაშე დავდგებით.

ამ დროს, მთავრობა აანონსებს ეროვნული მარკეტინგული სააგენტოს შექმნას, გუშინ ახალი პროგრამა გამოცხადდა - უმასპინძლე საქართველოში, მანამდე 2 დღე კომიტეტი ჩაის განვითარების და უფასო ხვნის პროგრამას განიხილავდა. ან დანერგე მომავალი და ჯალამბარიანი ტურბო, რომელიც მთელ საქართველოს გადარწყავს. რეკლამაზე ხმის ჩაწევა ქვეყნის მთავარი პრობლემა არაა. ესეთი მიდგომებით საქართველოს ეკონომიკას არ ეშველება. პირიქით, ეს ყველაზე საზიანო მიდგომაა, რომელიც ჩვენი ქვეყნის ყველაზე გაჭირვებული მოსახლეობის მდგომარეობას არტყამს".

გირჩის ლიდერმა ხელისუფლებას გადასახადების გაუქმებისა და ხარჯების შემცირებისკენ მოუწოდა.