მოკლედ: შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველებმა ბორჯომის მუნიციპალიტეტში, დაბა ბაკურიანში, თოვლის მასაში მოყოლილი კაცის ცხედარი, ინტენსიური საძიებო სამუშაოების შედეგად იპოვეს.

დეტალები: შსს-ს ცნობით, სამუშაოებში ჩართული იყო:

  • 200-მდე მეხანძრე-მაშველი,
  • სასაზღვრო პოლიციის ვერტმფრენი,
  • სამაშველო დრონები,
  • კინოლოგთა სამსახური და საქართველოს თავდაცვის ძალების წარმომადგენლები.

"გარდაცვლილის ცხედარი მაშველების მიერ ამოყვანილია თოვლის მასიდან და მიმდინარეობს შესაბამისი სამართლებრივი პროცედურები", — აცხადებს უწყება.

დამატებითი დეტალები: რადიო თავისუფლება წერს, რომ მათი ადგილობრივი კორესპონდენტის ცნობით, მაშველებმა ჯერ მიაკვლიეს "ბურანს", რომლითაც კაცი გადაადგილდებოდა, შემდეგ მის ტანსაცმელს და ბოლოს — ცხედარს.

  • გამოცემის თანახმად, გარდაცვლილი 48 წლის დიმიტრი გოგოლაძეა.
  • ის ბაკურიანის მკვიდრია და 28 მარტს, ტრაგედიის დღეს, რამდენიმე ადამიანთან ერთად, თოვლში "ბურანით" სეირნობდა.
  • მასთან ერთად მყოფი 5 ადამიანი ზვავს გადაურჩა.

გამოცემის თანახმად, ამ დროისთვის, გარდაცვლილი კაცი ექსპერტიზისთვის ახალციხეში გადაჰყავთ.