რა ხდება: სპეციალურმა საგამოძიებო სამსახურმა დააკავა პენიტენციური სამსახურის უფროსი ინსპექტორი, რომელმაც ცოლზე იძალადა.

დეტალები: გამოძიებით დადგინდა, რომ

2023 წლის ოქტომბერში, ინსპექტორმა, რომელიც ნასვამი იყო, სამსახურში მიაკითხა ცოლს, ჩაისვა მანქანაში და ეჭვიანობის ნიადაგზე, ფიზიკურად იძალადა.

ამის შემდეგ, ქალს დაემუქრა ავტომანქანის დაწვით და სიცოცხლის მოსპობით.

  • იმავე დღეს, სახლში დაბრუნებისას, კაცმა ცოლის ნების საწინააღმდეგოდ, ვითომ და მისი დამშვიდება სურდა, ფიზიკური ძალის გამოყენებით, რამდენიმე აბი დაალევინა. თუ რა პრეპარატი მიაღებინა მან ცოლს, საგამოძიებო სამსახური არ აკონკრეტებს.
  • გამოძიებით ასევე დადგინდა, რომ ბრალდებული ცოლზე არასრულწლოვანის თანდასწრებითაც ძალადობდა.

ქალმა სპეციალურ საგამოძიებო სამსახურს მიმართა, რის შემდეგაც, გამოძიება დაიწყო და პროკურატურასთან თანამშრომლობით, მოიპოვეს დანაშაულში მამხილებელი მტკიცებულებები.

  • სამართალდამცავი სასამართლოს განჩინებით დააკავეს.
  • ბრალი მას 48 საათში წარედგინება.
  • დანაშაული 3-წლამდე თავისუფლების აღკვეთას ითვალისწინებს.