ანდრო ბარნოვის თქმით, მას მოლაპარაკებები აქვს ახალ პოლიტიკურ ცენტრ გირჩთან გორში მაჟორიტარად კენჭისყრასთან დაკავშირებით:

“მიმდინარეობს კონსულტაციები და მე ვფიქრობ, რომ საბოლოოდ ასე იქნება და პარტია ამას ოფიციალურად გამოაცხადებს”, - თქვა მან On.ge-სთან საუბარში.

გირჩი ამ ეტაპზე აღნიშნულ საკითხზე კომენტარს არ აკეთებს.

ანდრო ბარნოვის თქმით, ამ თემაზე მოლაპარაკება მხოლოდ გირჩთან განიხილება, რადგან ის მისთვის ამ ეტაპზე ყველაზე რეალისტურ პარტიად გამოიყურება:

“მართალი გითხრათ, ერთადერთი გუნდია, რომელსაც აქვს სრულად ჩამოყალიბებული გეგმა იმის შესახებ, რა უნდა გააკეთოს ხელისუფლებაში მოსვლის პირველი დღიდანვე და ის ხედვა, რაც აქვს, არის სრულიად მისაღები და გასაგები ჩემი მხრიდან”.

კითხვაზე, რა ასპექტში დაემთხვა გირჩისა და ბარნოვის ინტერესები, მიხეილ სააკაშვილის საპრეზიდენტო ბიბლიოთეკის ყოფილმა უფროსმა გვიპასუხა, რომ ის იზიარებს მათ ეკონომიკურ პროგრამას:

“მთავარი არის ის, რომ ჩვენ უნდა დავამთავროთ ეს გატკეპნილი პოლიტიკა საქართველოში და დროა, ქვეყანა და საზოგადოება ავიდეს სულ სხვა ეტაპზე, აღარ არის დრო მჯიღის ბრახუნის და ჩვენ გვჭირდება ძალიან კონკრეტული ქმედებები, კონკერტული ხედვები”.

ანდრო ბარნოვი შიდა ქართლის გუბერნატორად 2013 წლის 12 იანვარს მიხეილ სააკაშვილმა წარადგინა. ამ თანამდებობაზე მას 1 წელიც არ გაუტარებია. მოგვიანებით ის სააკაშვილის საპრეზიდენტო ბიბლიოთეკას ხელმძღვანელობდა.