პარლამენტის დეპუტატი, ქართული ოცნების წევრი, ეკა ბესელია ამბობს, რომ ქართველთა მარშის ორგანიზატორების მიერ თათია დოლიძის მიმართ მუქარის საქმეზე პოლიტიკური განცხადებები საჭირო არ არის. ბესელიას თქმით, მას მუქარის შემცველი კომენტარების ერთ-ერთი ავტორის, გია კორკოტაშვილის პატრიოტიზმში ეჭვი არ ეპარება:

"გამოძიების პროცესში ჩვენ არ ჩავერევით და არც ერთ პოლიტიკოსს უფლება არ აქვს, გავლენა მოხდინოს გამოძიების მიმდინარეობაზე. მე გიას პატრიოტიზმში ეჭვი არ მეპარება, ნამდვილად და მის პატრიოტულ სულისკვეთებაში, ამიტომ ყოველგვარი სახელისა და გვარის გარეშე ჩვენ ამ პროცესში, რასაც გამოძიება აწარმოებს და უკავშირდება კონკრეტულ მუქარის ფაქტს, ამაზე გამოძიებამ უნდა იმუშაოს ისე, რომ ობიექტურად, ყოველგვარი მიკერძოების გარეშე მოხდეს ყველა მოქმედების ჩატარება."

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა. საქმეს 151-ე, მუქარის მუხლით იძიებს შინაგან საქმეთა სამინისტრო.

ქართველთა მარშის ორგანიზატორების წინააღმდეგ, ქალის გაუპატიურების ღია მუქარის გამო, 19 ივლისს ქალთა სოლიდარობის მარში ჩატარდა. აქციაზე შეკრებილი დემონსტრანტების ერთ-ერთი მოთხოვნა იყო, რომ ხელისუფლება და პოლიტიკური პარტიები ღიად გაემიჯნონ ძალადობას და ფაშიზმს.