ურუგვაი მსოფლიოში პირველი ქვეყანა გახდა, რომლის მთელს ტერიტორიაზეც მარიხუანის რეკრეაციული მიზნებისთვის გაყიდვა ლეგალური გახდა, თუმცა მკაცრი რეგულაციების ქვეშ.

მარიხუანის ლეგალიზაცია ურუგვაიში 2013 წელს მოხდა და მაშინდელი კანონმდებლობის მიხედვით, მოქალაქეებს პირადი მოხმარების მიზნით 6 ძირის მოყვანა შეეძლოთ. თუმცა, ამავე კანონის ფარგლებში, შესაძლებელი იყო ე.წ. კლუბების ჩამოყალიბება და შესაბამისად, უფრო მეტი რაოდენობის კულტივაცია.

ლეგალიზაციიდან 4 წლის შემდეგ, მარიხუანას არამხოლოდ მოყვანა, არამედ გაყიდვაც ლეგალური გახდა - თუმცა ამ პროცესს მკაცრი რეგულაციებით აკონტროლებენ.

მარიხუანით ვაჭრობის ბიზნეს მთლიანად სახელმწიფო აკონტროლებს, დათესვიდან - დაფასოებამდე.

კანაფის ყიდვა მხოლოდ ავტორიზებულ აფთიაქებში შეიძლება. მარიხუანის ყიდვა 18 წლამდე მოქალაქეებს არ შეუძლიათ. ყიდვის მსურველები სპეციალურ სააგენტოში უნდა დარეგისტრირდნენ, რის შემდეგაც მათი ყოველი ტრანზაქცია, რომელიც კანაფს უკავშირდება, სახელმწიფოს მიერ მკაცრად კონტროლდება. მაგალითად, ერთ რეგისტრირებულ მოქალაქეს თვეში მხოლოდ 40 გრამის შეძენა შეუძლია, შესყიდვის მომენტში გამყიდველები მათ თითის ანაბეჭდებს იღებენ და ქვეყანაში არსებული 16 ავტორიზებული აფთიაქის ბაზაში ამოწმებენ, რამდენი მარიხუანა აქვს კონკრეტულ ადამიანს ნაყიდი და ლიმიტს ხომ არ აჭარბებს.

ფოტო: Matilde Campodonico / AP

ფასიც სახელმწიფოს მიერ რეგულირდება და გრამი არც მეტი, არც ნაკლები, $1,30 ანუ, დღევანდელი კურსით, 3 ლარი და 11 თეთრი ღირს.

ურუგვაის მთავრობას არ უნდა, რომ ქვეყანაში მარიხუანის ტურიზმი განვითარდეს, ამიტომ კანაფის ყიდვა მხოლოდ მოქალაქეებს შეუძლიათ. დღეის მონაცემებით, სპეციალურად შექმნილ კანაფის კონტროლისა და რეგულაციის სააგენტოში 5 ათასი ადამიანი დარეგისტრირდა.

არსებული კანონმდებლობით იკრძალება მარიხუანის რეკლამირება, ბრენდინგი და აფთიაქის გარდა სხვა ტიპის სავაჭრო წერტილებში გაყიდვა.