რა ხდება: სახელმწიფო უსაფრთხოების სამსახურმა (სუსი) დააკავა კაცი, რომელიც ლაგოდეხის მუნიციპალიტეტში, სოფელ ნინიგორში მერის წარმომადგენლის თანამდებობას იკავებდა.

  • მას სამსახურებრივი მდგომარეობის გამოყენებით, სახელმწიფოს კუთვნილი ქონების თაღლითურად დაუფლებაში, თაღლითურად დაუფლებაში დახმარებასა და სამსახურებრივ
    სიყალბეში ადანაშაულებენ.

დეტალები: გამოძიებით დადგენილია, რომ მის მიერ გაცემული ყალბი ცნობების საფუძველზე, მოქალაქეები თაღლითურად დაეუფლნენ 1 746 934 ლარის ღირებულების სახელმწიფოს და კერძო საკუთრებაში არსებულ, ჯამში 37 864 მ 2 მიწის ნაკვეთს.

  • გარდა ამისა, ბრალდებული, სხვებთან ერთად, თაღლითურად დაეუფლა 105 199 ლარის ღირებულების 1928 კვადრატულ მეტრ მიწის ნაკვეთს.
  • ამ მიწის ნაკვეთებს ახლა ყადაღა ადევს.

ბოლო ხაზი: 2023 წლის 15 ნოემბრის ამნისტიის შესახებ კანონის თანახმად, პირი თავისუფლდება სისხლისსამართლებრივი პასუხისმგებლობისაგან, თუ სახელმწიფოს საკუთრებაში დააბრუნებს თაღლითურად დაუფლებულ მიწის ნაკვეთს, ან აანაზღაურებს ეკვივალენტურ ღირებულებას იმ შემთხვევაში, თუ მიწის ნაკვეთი გასხვისებულია კეთილსინდისიერ შემძენზე.

  • ეს კანონი არ ვრცელდება საჯარო მოხელეების მიერ ჩადენილ დანაშაულზე.
  • "მოქალაქეებს, რომლებიც ბრალდებულის დახმარებით თაღლითურად დაეუფლნენ სახელმწიფოს კუთვნილ მიწის ნაკვეთებს, განემარტათ კანონის მოთხოვნები, რომელთა შესრულების შემთხვევაშიც, არ დაეკისრებათ სისხლის სამართლის პასუხისმგებლობა", — წერს სუსი.